سرائیکی ڈرامیاں دے موضوع
سرائیکی وسیب وچ مختلف تہواراں، میلیاں ٹھیلیاں، شادی خوشی دے مواقع اُتے نقلی ٹولیاں، تماشے وال، بھنڈ، آپس وچ مختلف کرداراں دا روپ دھار کے جگت، وکتی بازی کریندے ہن۔ ڈرامے دی ایہ صورت منڈھ قدیم کنوں اڄاں تک ٹردی پئی ہے۔ سرائیکی زبان وچ منظوم ڈرامہ ’’ہیر رانجھا‘‘، سسّی پنوں، سوہݨی مہیوال، لیلیٰ مجنوں، مرزا صاحباں، سمّی راول، لوک داستاناں اُتے مشتمل ہوندا ہا۔
سرائیکی ڈراما دے موضوعات وچ کامیڈی کوں وی شامل کیتا ڳئے۔ ملتان، بہاولپور، ڈیرہ غازیخان آرٹس کونسل توں اسٹیج ڈرامے پیش کیتے ڳئے۔ اسٹیج ڈرامہ لکھݨ والیاں وچوں قیصر ملک، منیر ملک، نسیم ملک، اسلم شاد، منور شہزاد، نصرت مند خان، اشتیاق خان، معراج خالد، طارق جاوا، منظور ساجد، منیر تاج، انور جٹ، قمر زیدی، نذر انجم، زوار بلوچ، اے۔ ایس بزمی، غلام مصطفیٰ، سلیم قیصر، مظہر احسن، مقبول بلوچ، مقبول عباس کاشر، محسن گیلانی، جاوید شکیل، پی۔ ٹی۔ وی ملتان توں راہب ملہار، طارق شاہ، قاسم سیال، محسن گیلانی دے سرائیکی ڈرامے معاشرتی مسائل تے طنز و مزاح تے مبنی ہن۔
’’عہد قدیم کنوں سرائیکی وچ ڈرامہ لکھیندا آندے اتے اسٹیج تے وی پیش کیتا ویندا رہ ڳئے۔ ہندواں دے مذہبی تہوار، دُسہرے وچ ہک مہینے تک ناٹک سبھا پیش کیتا ویندا ہئی۔ جیندے وچ رام لِیلا، رام کہاݨی، رام لچھݨ دا بن باس، جھیٔں ڈرامے ہوندے ہن۔‘‘ (۱۸)[١]
زمانۂ قدیم توں گھن تے اڄوکے دور تک سرائیکی ڈرامے دی لکھت، پیشکش وچ کئی تبدیلیاں، مختلف انداز اپنائے ڳئے ہن۔ اسٹیج، سٹریٹ تھیٹر (این جی اوز دے توسط نال)، ریڈیو، ٹیلی وژن تک ایندا سفر جاری ہے۔[٢]
’’جاں جو، دور جدید دی ضرورتاں کوں سامݨے رکھیندے ہوئے انفارمیشن ٹیکنالوجی اتے سائنس فکشن اُتے مبنی موضوعات بارے نویاں جہتاں دے نال ڈرامے لکھݨ دی گنجائش موجود ہے۔‘‘[٣]
ٻیا ݙیکھو
[لکھو | ماخذ وچ تبدیلی کرو]حوالہ جات
[لکھو | ماخذ وچ تبدیلی کرو]- ↑ ڈاکٹر طاہر تونسوی، ’’سرائیکی ادب ریت تے روایت‘‘، ملتان بیکن بکس، اشاعت ۲۰۱۰ء، ص: ۱۵۱
- ↑ از: سئیں ڈاکٹر خالد اقبال۔ تحقیقی مقالہ۔
- ↑ منورشہزاد، ’’مضمون‘‘، ملتان میں نشری ڈرامے کا ارتقاء، مشمولہ، ڈرامہ نمبر ’’آہنگ‘‘، اشاعت جون، جولائی ۲۰۰۶ء، ص: ۴۸
۔ ۔ ۔ ۔ ۔ ۔ ۔