پاکستان ٹیلی ویژن دے ڈرامے

۲۰۰۴ء وچ پاکستان ٹیلی وژن توں ٹیلی کاسٹ، رضا گیلانی دے ڈرامیاں دی کتاب ’’کنوار‘‘ شائع تھئی ہے۔ ۲۰۰۶ء وچ نامور ڈرامہ نگار حفیظ خان دے لکھے ہوئے ڈرامیاں دی کتاب ’’رُٹھڑے پندھ‘‘ ملتان انسٹیٹیوٹ آف پالیسی اینڈ ریسرچ سنٹر ملتان توں شائع تھئی ہے۔ جیندے وچ ست ڈرامے شامل ہن۔ ۲۰۰۷ء وچ ’’سرائیکی ریڈیائی ڈرامے‘‘ دے عنوان نال ڈاکٹر خالد اقبال دی مرتب کیتی ہوئی ڈرامیاں دی کتاب جھوک پبلشرز ملتان ولوں شائع تھئی۔ جیندے وچ رفعت عباس، حسن رضا گردیزی، منور شہزاد، غلام حسن حیدرانی، نصر اللہ خان ناصر، شبیر حسن اختر، مسرت کلانچوی، حفیظ خان، خالد اقبال، طارق شاہ، عامر فہیم، رفیق خاور جسکانی تے ڈاکٹر انوار احمد دے لکھیل ڈرامے شامل ہن۔ سن ۲۰۱۲ء وچ خالد اقبال دے ریڈیو تے ٹیلی وژن، اسٹیج ڈرامیاں دا مجموعہ، ’’نکڑ ناٹک‘‘ شائع تھیا۔ جیندے وچ ست ڈرامے شامل ہن۔ انہاں ڈرامیاں دے موضوعات غربت تے افلاس دے ماریئے ہوئے مسائل زدہ لوک ہن۔سرائیکی ڈرامے دے فروغ وچ ریڈیو پاکستان ملتان، بہاولپور، ڈیرہ اسماعیل خان، میانوالی دا ٻہوں اہم کردار ہے تے پاکستان ٹیلی وژن لاہور ’’پروگرام‘‘، ’’رُت رنگیلڑی‘‘دے راہیں ساݙے وسیب دے نامور لکھیاریاں اصغر ندیم سید، محسن گیلانی، حفیظ خان تے ٻئے لکھاریاں دے ڈرامے نشر تھئے۔ جیندے نال ڈرامے دے ہیئتی نے موضوعاتی حوالے نال تبدیلی میسر آئی۔ پرائیویٹ ٹی وی چینلز توں ٻہوں زیادہ ڈرامے نشر تھئے۔ ڈرامہ سیریئل بݨائے ڳئے۔

حفیظ خان دی تخلیقی شخصیت دیاں کئی جہتاں ہن۔ انہاں ریڈیائی تے ٹیلی وژن ڈرامے ریڈیو دے عروج دے دور وچ لکھیئے۔ ’’کچ دیاں ماڑیاں‘‘ انہاں دے سرائیکی ریڈیائی ڈرامیاں دی کتاب ہے۔ جیندے وچ ’’پیلے پتراں دی بہار‘‘، ’’ݙو ݙونڑے ہک‘‘، ’’ریشم دی کلہی تند‘‘، ’’بُھردی کندھ‘‘، ’’خوبصورت ڈرامے‘‘ شامل ہن۔ ’’کوئی شہریں جنگل کوکدا‘‘ ٹیلی ڈراما سیریل تے بے شمار ٹیلی وژن ڈرامے لکھ تے انہاں صنف ڈرامے وچ آپݨا بھرنواں حصہ پاتے۔ مسرت کلانچوی نے سرائیکی افسانے تے خوبصورت ڈرامے ریڈیو ٹیلی وژن کیتے لکھیٔن۔ جتھاں وچوں ’’پکیاں دی نوکرانی‘‘، ’’سونے دے ڳاݨہے‘‘، ’’طعنے مہیݨے‘‘، ’’بے جوڑ شادی‘‘، ’’وٹہ سٹہ‘‘ تے ٻئے ٻہوں سارے فیچرز ڈرامے شامل ہن۔ قاسم جلال دے ٹیلی ڈرامیاں دی کتاب ’’رُت رنگیلڑی‘‘ سرائیکی وسیب دے سماجی معاشرتی مسائل اُتے معنی ہے۔