ٻالیں دیاں لوک کھیݙاں

اَڄ دیہات ون٘ڄو تے بھاویں شہر دی ڳلی محلّے وِچ جھاتی پاؤ تُہاکُوں کرکٹ دی وٻا ہر جاہ تے نظر آوسے۔ اے کرکٹ دراصل سرائیکی لوک کھیݙ "گُھرے آلی گوڑھی" وِچُوں نِکتی اے۔ کرکٹ کُوں میڈیا دے پروپیگنڈے اَسمان تے پُچا ݙِتّے اَتے اساݙی اصل شئے "گُھرے آلی گوڑھی" مر ڳئی اے۔ حالانکہ کرکٹ سو فیصد "گُھرے آلی گوڑھی" دی وِڳڑی شِکّل ہِے۔ توݨیں جو سرکاری کھیݙاں، کرکٹ، ہاکی، فٹ بال، والی بال، بیڈ منٹن، بلیرڈ، پولو تے شطرنج وغیرہ ترقی کر ڳئین پر سرائیکی وسیب دے کھیݙیں دی اَڄ وی اہمیّت زیادہ ہِے، دیہات وِچ رہݨ والے بِھرا اَڄ وی اپݨے لوک کھیݙاں نال محبّت کرین٘دِن۔ ہر قوم دیاں اپݨیاں اپݨیاں لوک کھیݙاں تے اُنّھاں دے اپݨے اپݨے اصول ہون٘دِن پر تاش تے لݙو اِیہو جئیں کھیݙ اے جیڑھی ہر قوم تے ہر قبیلے تے ہر ملک وِچ پاتی وین٘دی اے۔ البتّہ اِین٘دے کھیݙݨ دے انداز اَنجو انج تھی سڳدِن۔ سرائیکی وسیب دے دیہاتی لوک کھیݙاں وِچُوں لُک چھپ، شیدݨ، نوں تِرن،ٻارھاں تِرِن، گنجی کبوتری، ݙیٹی ݙنّاں، دھی دھی، چیکل، وریا اَتے اِیں طرح دِیاں ٻیاں کھیݙاں ݙاڈھیاں مشہور ہِن۔ پروفیسر دلشاد کلانچوی ہوراں بہاولپور دے لوک کھیݙاں بارے جاݨ سُنڄاݨ کرائی اے، پر کھیݙاں ٻارے ݙاہ جِلداں دی کتاب لکّھی ونڄے تاں وی تھولی تھیسے، کیوں جو سرائیکستان وسیع خطّے دا ناں ہِے تے ہر علاقے دیاں اپݨیاں لوک کھیݙاں ہِن۔ کُجھ لوک کھیݙاں دی تن٘دِیر تَلّے ݙِتّیاں ڳئیاں ہِن اُنّھاں دی تفصیل وِی اُنّھاں دے لِنک وِچ موجود ہِے ملاحظہ کرو: