گُݙّی گُݙّے دی شادی

وکیپیڈیا توں

اساݙے سرائیکی وسیب[١] دے لوک کھیݙاں دی ہِک چنڳی اتے وَکھری ڳالھ اِیہ وی ہِے جو اِیہ لوک کھیݙاں سبھݨاں کِیتے ہِکّے کائے نِھیں جاں جو چھوہِرِیں / تِریمتِیں / زنانیاں اَتے چھوہَراں / مرداں کِیتے اَنجو اَنج وی ہِن۔ کُجھ لوک کھیݙاں صرف مرداں / چُھوہَراں کِیتے ہِن اَتے کُجھ لوک کھیݙاں خاص الخاص چھوہِرِیں / تِرِیمتیں کِیتے ہِن۔ چھوہِریں آلے کھیݙاں نِکّیاں نِکّیاں ٻالڑیاں کُوں ٻہوں بھان٘دیاں ہِن اَتے اُنّھاں دے مزاج دے مطابق ہِن اَتے نِکّی ٻالڑی جیڑھے وی دیس بدیس دی ہووے اُوکُوں اُوہ کھیݙاں کھیݙ تے ٻہوں چَس اَمدی ہِے۔ گُݙّی گُݙّے دی شادی دے کھیݙ دی تفصیل ݙیکھو:

اے محض چھوہِرِیں دا لوک کھیݙ اے تے اے کھیݙ چھوہِرِیں وِچ ٻہوں پسند کِیتا وین٘دے۔ اِین٘دے وِچ چھوہِرِین کِیتے شادی دیاں رَسماں رِیتاں کنُوں واقفیّت حاصل تِھین٘دی اے۔ در اصل اے وݙّے لاء دی اصل شادی دی ہِک قِسم دی مشق یا ریہرسل ہِے۔ عملی تربیّت وی اِیکُوں آکھیا ون٘ڄ سڳدے۔ اِین٘دے وِچ شادی شدہ حیاتی کُوں سوہݨاں، مَن موہݨاں اَتے خوشگوار طور تے گذارݨ دا سبق وی مِلدے۔ تے اپݨیاں جذبیاں تے احساساں دا اظہار کرݨ دا موقع وی مِلدے۔ اے جذبے تے احساس وی سرائیکی لوک گِیت دی شِکّل وِچ پیش کِیتے وین٘دِن۔ اے ٻہوں مزیدار کھیݙ ہِے تے شہراں تے وستیاں وِچ ہِکّو جِیہاں پسند کِیتا وین٘دے اَتے خوب کھیݙیا وین٘دے۔ اِین٘دے وِچ چھوکریاں تھڳڑیاں نال گُݙّی گُݙّے بݨاں تے اُنّھاں دی شادی کرین٘دِن۔ اَتے ہِک ٻئے دے گھراں وِچ ون٘ڄ تے وسیب دے اصلی شادی دیاں رِیتاں آلی کار اِیکُوں کھیݙدِیاں ہِن۔[٢] اِین٘دے بارے ہِک ٻال ادب دی ہِک مہان٘دری لوک نظم وی ملاحظہ کرو جیڑھی اُون٘ویں تاں ݙوہڑے آلی کار ہِے جاں جو اِیہ ٻال ادب دی ہِک نظم وی ہِے:

گڈی گڈا لہور دا مِین٘ھ وَسّے زور دا

گُڈّی گُڈّا کراچی دا مِین٘ھ وَسّے لاچی دا

گُڈّی گُڈّا ملتان دا مِین٘ھ وَسّے شان دا

گُڈّی گُڈّا دیرے دا مِین٘ھ وَسّے پھیرے دا

ٻیا ݙیکھو[لکھو | ماخذ وچ تبدیلی کرو]

حوالہ جات[لکھو | ماخذ وچ تبدیلی کرو]

  1. از: لائبریری سئیں ڈاکٹر خالد اقبال۔
  2. از: ظہور دھریجہ، ناں کتاب: سرائیکی وسیب، چھپَّݨ دا ویلا: نومبر 2003ء اتے 2013ء، چھاپہ خانہ: جھوک پرنٹرز ملتان۔

ٻاہرلے جوڑ[لکھو | ماخذ وچ تبدیلی کرو]