ٻالیں دیاں لوک نظماں

کہیں وی زبان دے لوک ادب وِچ ٻالیں دے قصّیں دے نال نال نظماں کوں وی خاص اہمیّت حاصل ہون٘دی ہِے، جیویں جو موجودہ دور اِچ اساݙے شاعر تے ادیب نِکّے ٻالاں دے لوک ادب تے کَم تاں کرین٘دے پئے ہِن پر اُوہ ٻہوں تھولا ہِے۔ البتّہ اساں ڳول پھول کروں تاں اساکوں ٻالاں دا لوک ادب ٻہوں مِلدے۔ اِین٘دے وِچ لوک قِصّے، لوک کہاݨیاں، وی ہِن اَتے لوک نظماں وی۔ اے قصّے کہاݨیاں تے نظماں اَساں بلپݨ تُوں سݨدے اَمدے ہِسے، اساݙے وݙّے ݙسین٘دِن جو اِیہے نظماں تے قصّے اساں وی اپݨے وݙیں تُوں سُݨیے ہَن، ایویں غور کروں تاں انّھاں نظماں کوں کئی سو سال پہلے دیاں نظمان آکھیا ون٘ج سڳدے، اِنّھاں نظماں دے خالق دا پتہ نی لڳ سڳیا۔ البتّہ اے نظماں تخلیقی شاہکار ہووݨ دے نال نال وسیب دے ٻالیں وِچ مقبول ہِن۔ ہر ٻال خصوصاً دیہاتاں دے ٻالیاں کُوں اے نظماں زبانی یاد ہِن۔ اِنّھاں نظمیں دے کُجھ نمونے سرائیکی وسیب نال محبّت کرݨ والے بِھران٘ویں دی خذمت وِچ اِیں اُمین٘د نال پیش کرین٘دوں جو اِیں کم کُوں اڳّوں تے ٹوریا ویسی تے ٻال ادب کُوں ودھ تُوں وَدھ تَکڑا کِیتا ویسی۔

گُڈّی گُڈّا لہور دا

گڈی گڈا لہور دا مِین٘ھ وَسّے زور دا

گُڈّی گُڈّا کراچی دا مِین٘ھ وَسّے لاچی دا

گُڈّی گُڈّا ملتان دا مِین٘ھ وَسّے شان دا

گُڈّی گُڈّا دیرے دا مِین٘ھ وَسّے پھیرے دا

اَکّڑ بَکّڑ بن٘ٻّے بو

اَکّڑ بَکّڑ بَنٻّے بو

اَسّی نوّے پورا سَو

سو کلہوٹا، تِتّر موٹا

چَل مداری پیسہ کھوٹا

اللہ میاں سچّے

اَدّھی چُھٹّی ساری

مُلّاں مچّھی ماری

مُلّاں ڳِیا دِلّی

گِھن آیا بِلّی

بِلّے دے ݙُو ٻچّے

اللہ میاں سچّے

ٻیا ݙیکھو

• ڳان٘مݨ سچّار۔

• سرائیکی وسیب دے لوک پہناوے۔

• سرائیکی وسیب دے لوک گھاٻوٹ۔

• قِصّہ قصولی۔

• سرائیکی وسیب دے لوک مذاہب۔

ٻاہرلے جوڑ

• جھوک پبلشرز دے کتاباں۔

• سئیں ظہور دھریجہ دا تعارف اُردو زبان وِچ۔  ۔ ۔ ۔۔ ۔ ۔ ۔ ۔ ۔