خانوادۂ کلیمیہ دے دستکار خطاط

مخدوم محمد حسن خان کلیم رقم دے وݙے پُتر محمد مختار حسن (ڈبل ایم اے) وی خطاط ہَن۔ اُنہاں خطاطی دے لوک فن دے نال نال کمرشل کم وی کیتا اَتے اُردو بازار ملتان بیرون بوہڑ گیٹ اِچ باقاعدہ احسن خطاطی سنٹر دے ناں نال ادارہ قائم کر کے خوشخطی کوں فروغ ݙیوݨ دا کم کریندے رَہ ڳئے ہَن۔ بعد اِچ او لاسال ہائی سکول اِچ اُستاد مقرر تھئے اُنہاں دے دَور اِچ لاسال سکول اِچ پڑھن آلے ٻالاں دا خط وی چنڳا ہوندا ہَا۔ کیوں ڄو او نال نال ٻالاں کوں خوشخطی دی سمجھ بوجھ وی ݙیندے راہندے ہَن۔ اُنہاں دے پُتر راشد مختار وی خطاط اَتے آرٹسٹ ہن۔

اِینویں محمد حسن کلیم رقم سئیں دے ݙوجھے پُتر حافظ محمد اقبال عرف ابن کلیم احسن نظامی ہِن ڄہڑھے خطاط ہفت قلم ہِن اَتے اُنہاں خطاطی دی دُنیاں اِچ ہِک نواں طرزِ تحریر خط رعنا دے ناں نال ایجاد کیتے۔ خطاطی دے کئی سو تخلیقی فن پارے بݨائے ہِن۔ اَتے اُنہاں دیاں نمائشاں کیتیاں ہِن۔ پاکستان دے یَکے شہراں، سعودی عرب، بھارت، ایران، عراق، شام، سویڈن، ڈنمارک اَتے ناروے وغیرہ اِچ اُنہاں دے فن پاریاں دیاں نمائشاں تھی چُکن۔ نال اِی اُنہاں نے لوک فن خطاطی دے وَدھارے کیتے سَت کتاباں وی لکھن اَتے چھاپن وَت اَڳاں انہاں دے پنج پُتر خطاط ہِن۔ ڄہڑھے آپݨے اَبا سئیں ابن کلیم دے شاگرد ہِن۔

وݙے پُتر دا ناں محمد جمال محسن ہِے ڄہڑھا خطاط ہفت قلم ہِے اَتے کراچی اِچ ایں فن کوں عام کریندا پئے اُوں نے خطاطی دا نصاب وی بݨائے ڄیندی مدد نال لوک آپݨا ہتھ خوشخط بݨا سڳدن۔ خطِ کوفی دا وݙا ماہر ہِے اُوں خطِ کوفی اِچ اللہ سئیں دے 99 فن پارے ڈیزائن کر کے کراچی آرٹس کونسل اِچ نمائش کرائی ہِے۔ لندن اِچ وی اوندے فن پاریاں دی نمائش تھی چکی ہِے۔

ݙوجھے پُتر محمد مختار علی ہِن ڄہڑھے بہترین خطاط ہفت قلم اَتے ہونہار شاعر وی ہِن تخلیقی خطاطی اَتے کمپیوٹر دے ذریعے فن پارے بݨاون اُنہاں دا وکھرا کمال ہِے۔ اُنہاں دے ترے شعری دے مجموعے وی چھپ چُکن ڄنہاں دی خطاطی اِ چ اُنہاں دا ہنر وی خود بولیندا پئے۔ سعودی عرب اِچ وِی انہاں دے فن دا چرچا ہِے۔

تریجھے پُتر حامد اقبال خان ہِن ڄہڑھے خطاط ہفت قلم ہِن بطور خاص خطِ ثلث لکھݨ اِچ وݙی مہارت اَتے کمال رکھدن اے وی خطاطی دی سکھلائی دیاں ترے ، چار کتاباں دے مصنف ہِن۔ خطاطی دا تخلیقی اَتے کمرشل کم کریندے پین۔ اُنہاں وی کمپیوٹر دے ذریعے کلر سکیم دے نال کئی شاہکار فن پارے تخلیق کیتن۔ فرانس اِچ ایندے فن پاریاں دی نمائش تھی چکی ہِے۔

چوتھا پُتر محمد آصف اقبال خان ہِے۔ انہاں وی آپݨے اَبا جی توں سارے خط سِکھن اَتے شوقیہ طور تے ایں کم کوں کریندن کیوں ڄو ملازمت کریندن۔ پنڄواں پُتر مبشر کلیم خان ہِے ڄہڑھا خطاطی وی کریندے اَتے کمپیوٹر ڈیزائننگ دَا وی ماہِر ہِے۔

اے خانوادۂ کلیمی کئی نسلاں توں ملتان دی دھرتی کوں فنِ خطاطی دے نال مالا مال کریندا پئے محمد حسن خان کلیم رقم دا خطاطی دا فیضان عام تام تھیندا پے۔ سچ تاں اِے ہِے ڄو اے حضرت مولانا قائم الدین خان لنگاہ توں پُشت در پُشت فیض جاری و ساری ہِے۔ اَتے نال اِی حضرت حافظ بشیر احمد قریشی العراقی دے خاندانِ عراقی دا وی ملتان تے احسان ہِے ڄو ایں فنِ خطاطی دا روایتی اَتے تخلیقی عمل مسلسل جارے ہِے۔^[١]