ملتان دی دھرتی اتے خوشنویسی دا لوک فن

وکیپیڈیا توں

ملتان / سرائیکی وسیب سرائیکستان دی دھرتی دی پُراݨی اَتے قابلِ قدر روایتاں دے حامل بعض قابلِ احترام خاندان ڄیڑھے ڄو اِیں مقدس خطے دے پاکیزہ روائتاں کُوں زندہ اَتے پائندہ رکھݨ کُوں آپݨی زندگی دا بہترین حاصل سمجھدے ہَن۔ اُنہاں نے آپݨیاں اولاداں کُوں خوشنویسی دی تربیت ݙیواوݨ آپݨی تے آپݨی اولاد دی زندگی دا اہم جزو سمجھیا۔ اُنہاں اُستاد شیر محمد سئیں تے ٻئے قابل ذکر اُستاداں خطاطاں، خوشنویساں دیاں خدمات حاصل کیتیاں تے آپݨیاں اولاداں کُوں سوہݨی لکھائی نال پڑھائی سمیت سوہݨاں کیتا۔ اُستاد شیر محمد سئیں نے وی، فراخدلی دا ثبوت ݙیندے ہوئے سچے دل نال خطاطی دے فروغ اَتے ترقی کُوں ہمیشاں سامݨے رکھیا اَتے ایں فن کوں عوام اَتے خواص اِچ عام کیتا اِنہاں جتھاں سئیں ملک محمود احمد اعوان اَتے انہاں دے بھرا ملک بشیر احمد اعوان اَتے ٻئے کئی معتبر گھرانیاں دے چھوٹے وݙے بچے اَتے بچیاں کُوں خوشنویسی دِیاں رَمزاں تُوں چانݨ ݙتا اُتھاں آپݨے گھر آنوݨ آلے غریب اَتے مستحق مرد اَتے خواتین کُوں وی باقاعدہ ایں فن توں سرفراز کرݙتا۔ تاکہ غریب اَتے بے روزگار لوک اِیں فنِ شریف کُوں سِکھ ونجݨ دے بعد روزگار دا ذریعہ بݨا سگِن۔

سئیں ملک محمود احمد اعوان نے اے ڳالھ ݙسی ڄو سئیں استاد شیر محمد اَساݙے خاندان دے ہر چھوٹے وݙے دے اُستاد ہِن‘ تے وت پتہ لڳیا ڄو ملک صاحب دے اُو یکے عزیز و اقارب ڄیڑھے ٻنھاں ملکاں اِچ رہائش رکھن او سارے اُستاد شیر محمد توں خطاطی دے فن نال فیضیاب تھَین اُنہاں دے خط ڄݙاں ٻِنہاں ملکاں توں آندن تاں او حسنِ تحریر دے جلویاں نال پُر ہوندن جنہاں کوں ݙیکھ تے ہر فرد دا دل خوش تھیندے۔ ہِیں خاندان دے ہِک اینجھیں فن شناس ڄنہاں دی سُوجھ بوجھ دا جواب نئیں او سئیں نواز احمد اعوان کراچی اِچ طارق روڈ تے آپݨاں قیام رکھدن‘ او خطاطی دیاں کئی رمزاں دے بارے اِچ بصیرت رکھدن خطاطی دے شائقین اَتے ماہراں کیتے اُنہاں دیاں معلومات حیران کر ݙیوݨ آلے ہِن۔ خطِ نسخ ہووے، ثلث یا نسخ، اَتے خط دیوانی ہووے یا خط رقعہ، خطِ کوفی تے بھانویں خطِ نستعلیق سب دیاں باریکیاں توں واقف ہِن ‘وت نستعلیق دہلوی، لاہوری اَتے کراچی طرز دیاں باریکیاں اَتے اُنہاں دیاں فنی رمزاں لوکاں کوں سمجھیندے ہِن۔ حالانکہ عملی طور تے او انجنیئرنگ دے شعبے نال منسلک ہن۔ پر اُنہاں دے ذوقِ جمال کُوں داد ݙینونی پوندی ہِے۔ اُنہاں نے خطاطی دے فن کُوں اِیں طرحاں سمجھے ڄینویں سمجھݨ دا حق ہوندا ہِے۔ نواز اعوان سئیں ہِیں مذکورہ فیملی دے قابلِ فخر فرزند ہِن۔ اَتے اُستاد شیر محمد سئیں دے فیضان دا مُنہ بولیندا ثبوت ہِن۔[١]

ٻِیا ݙیکھو[لکھو | ماخذ وچ تبدیلی کرو]

حوالہ جات[لکھو | ماخذ وچ تبدیلی کرو]

  1. از: "ابن کلیم" "ملتان دے لوک فنون وِچ روائتی خطاطی دا ارتقاء" (١٩٧٠ء تُوں پہلاں)، باہتمام: دبستان فروغ خطاطی (رجسٹرڈ)۔ (غیر مطبوعہ سرائیکی مقالہ)۔

ٻاہرلے جوڑ[لکھو | ماخذ وچ تبدیلی کرو]