مخدوم محمد حسن خان کلیم رقم

احسن التحریر مخدوم محمد حسن خان کلیم رقم مملکتِ خداداد پاکستان دے ہِک ماہر اَتے مشاق خوشنویس / دستکار ہووݨ دے نال نال فنی کمال اِچ ٻہوں خوبیاں دے مالک ہَن۔ ڄتھاں اُو پَکے مسلمان ہَن اُتھاں او ہِک عظیم انسان ہَن۔ نماز، روزہ دے پابند بلکہ وِرد وظائف دے عامل وی ہَن۔ سرزمینِ ملتان دیاں پراݨیاں روایتاں دے سچے پکے حامی ہَن۔ سوہݨے اخلاق آلے اَتے وݙی انکساری آلے ہَن۔ ڄیکوں مِلدے ہَن کھلدے مسکراندے ملدے ہَن، پیار محبت نال ہر چھوٹے وݙے کُوں پیش آندے ہَن ہر ویلے ہشاش بشاش اَتے کُھلے مَتھے نال راہندے ہَن آپݨے بزرگاں دے سوہݨے نقش ہَن۔ شلوار قمیض اُتے ایچکن وَل سِر تے کُلہے آلا مایہ لگیا پَٹکا اِے اُنہاں دا دِل بھاندا ویس ہا۔

مخدوم محمد حسن خان لنگاہ عرف ’’کلیم رقم‘‘ استاذ العلماء اَتے استاذ الحفاظ، عالمِ باعمل اَتے ولیٔ کامل حضرت حاجی حافظ محمد عبد اللہ خان لنگاہ چشتی دے وݙے پُتر ہَن ڄیڑھے 1916ء مطابق رمضان المبارک محلہ قدیر آباد ملتان اِچ ڄمے۔ انہاں نصابی تعلیم اَتے دین دے علم آپݨے اَبا سئیں تُوں پاتے۔ ڄیڑھے ویلے آپݨی طبیعت دے میلان دے مطابق عملی زندگی اِچ قدم رکھیا تاں خطاطی و خوشنویسی سِکھݨ دا شوق ظاہر کیتا۔ تاں اُنہاں دے اَبا سئیں نے پوری پوری دلجوئی اَتے سرپرستی کیتی۔ اُنہاں نے جلد سازی وی کیتی کیوں ڄو اُنہاں دے ݙو مامے مولوی احمد یار خان لنگاہ اَتے مولوی محمد یار خان لنگاہ ملتان دے وݙے ٹھکݨ جلد ساز ہَن ہِیں سانڳے جلد سازی وی گھر دا ہنر ہئی۔ محمد حسن کلیم وݙے چاق و چو بند راہندے ہن۔ جوانی اِچ پہلوانی وی کریندے ریہے۔ سرکاری طور تے دَھرُکݨ دے مقابلیاں اِچ حصہ گھندے ہَن اَتے اکثر جِت کے انعام وی جِت گھندے ہَن۔ پنجاب پولیس نے اُنہاں کوں ملازمت ݙتی اَتے دَوڑاں اِچ حصہ ڈیوایا 1945ء اِچ ہِک دَوڑ اِچ جیتݨ تے اُنہاں کُوں سند ملی ڄیڑھی کہ اَڄ وی سانبھی پئی ہِے۔

سلسلۂ طریقت اِچ محمد حسن خان کلیم خاندانِ عراقی دے مشہور اَتے یکتائے زمانہ بزرگ (ڄیڑھے کہ آپ دے ناناں وی لڳدے ہَن) وݙے عالم، مفتی اَتے وݙے صالح حضرت مولانا محمد حسین بخش ملتانی چشتی ثمّ عراقی دے مُریدتھی ڳئے۔ باقاعدہ اِنہاں دی خدمت اِچ حاضر رہندے اَتے طریقت دے سبق گھندے۔ اِنہاں دیاں مبارک تعلیمات دا اثر محمد حسن خان لنگاہ تے ہئی۔ ڄیڑھا اُنہاں دی شخصیت اِچ جھلکاں مریندا ہئی۔^[١]