لوک قِصّہ کیا ہِے؟

لوک قصّہ بنیادی طور تے لوک دانش (Folk wisdom) دا ݙوجھا ناں ہے۔ کوئی وی قصہ ایہو جھئیاں نہ ہوسی جیندے وچ کوئی نہ کوئی لوک دانش موجود نہ ہووے۔ لوک قصہ لوک دانش دا صدیاں دے انسانی تجربات ، مشاہدات تے حقائق دا نچوڑ ہوندے۔ لوک قصے دی اہمیت انسانی حیاتی کیتے پاݨی وانگوں ٻہوں اہم ہے۔ لوک قصے اپݨے جغرافیہ، کلچر، تاریخ اتے تہذیب و تمدن کوں نشابر کریندن۔ کہیں قوم دی ابتدائی ، انفرادی تے اجتماعی زندگی بارے قصے کہاݨیاں وچ ڈھیر کجھ موجود ہوندے ۔ جیندے نتیجے دے طور تے انہاں دی اہمیت اڳوں تے آ ویندی ہے ۔ اساں قصے کہاݨیاں دے ذریعے کہیں قوم دی ثقافت بارے ڄاݨ سڳدے ہئیں مثلاً انہاں دے عقائد ، خواہشاں ، رسماں ،رِیتاں تے رہݨ سہݨ بارے ڄاݨ سڳدے ہئیں۔کہاݨی وچ ورتیے ڳئے تخیل کوں اساں سطحی طور تے گھندے ہیں جے کر غور نال ݙٹھا ونڄے تاں اَحٖ وی ایہ عظیم تر انسان دے تخیل دا مساوی اظہار ہے ۔

"ڈاکٹر سہیل بخاری" کہاݨیاں وچ انہاں دے تخیل کوں واضح کیتے او آکھدن:

"کہاݨی دا تخیل مستقبل کوں ماضی تے خواہشاں کو ںواقعہ بݨا تے پیش کریندے۔ آوݨ والے وقت دی تصویر چھکیندے ، فطرت کوں قابو کرݨ دیاں تدبیراں سِکھیندے تے ترقی دے جگ ݙکھیندے۔"

قصہ زندگی تے اثر انداز تھیوݨ والے طرزِ احساس ، طرز فکر تے طرزِ عمل کوں بیان کریندے تے خواہشاں کوں ہر حالت وچ پورا کریندے ۔ انہاں کہاݨیاں دا گاٖنڈھا حیاتی نال کریندے ہوئے

ڈاکٹر موہن سنگھ دیوانہ لکھدن:

"اے کہاݨیاں تاں زندگی دے اسلوب نال ہِن ۔ زندگی دیاں بنیادی اہمیتاں تے ریہݨ سہݨ کوں اُجاگر کریندن۔ انہاں کہاݨیاں وچ عقل و دانش دا درس لفظیں تے ڳالھِیں وچ اِی نی بلکہ عمل دے ذریعے ݙتا ویندے۔"

ٻِیا ݙیکھو

• سرائیکی ادب وِچ لوک قِصّے دی اہمیّت

• لوک قصّے دا اساݙی حیاتی تے اثر

• لوک قِصّے تے لوک کہاݨیاں دی اہمیّت

• لوک قصّہ تے انسانی حیاتی

• جدید دور اتے لوک قصّے کہاݨیاں

ٻاہرلے جوڑ

• ڈاکٹر خالد اقبال صیب دی لائبریری دا ٻِیا مواد۔۔۔۔۔