سرائیکی لوک ادب دے ݙوہڑا تے عاشقِ رسول

دلنور نور پوری ہک سچے عاشقِ رسول ﷺ دی حیثیت نال نبی پاک ﷺ دی ذات نال ٻہوں عقیدت اتے محبت رکھیندن۔ اُنھاں دے سرائیکی لوک ݙوہڑے وچ کائنات دی ایں عظیم ترین ہستی دی شان ٻہوں سوہݨے انداز نال بیان کیتی گئی ہے۔ اُنھاں دے ڈھیر سارے سرائیکی نعتیہ ݙوہڑے ملدن جیڑھے اُنھاں دی نبی پاک ﷺ نال دِلی عقیدت کوں نشابر کریندن او نبی سئیں کوں نور منیندن اتے ایں گاٖلھ تے وی یقین رکھیندن جو نبی پاکؐ دی وجہ نال ہی اے ساری کائنات اللہ پاک بݨائی اتے سجائی اے۔ ونکی دے طور تے اُنھاں دا اے نعتیہ ݙوہڑہ ݙیکھو:

اوندے نور توں عرش تے فرش بݨیے انسان تے موت حیات بݨی

کیا نار جنت ،کیا حور ملک، سجھ چن تارے ݙینھ رات بݨی

الحمد کنوں والناس توڑیں اوندی شان اچ ہر آیات بݨی

دلنورؔ ہے میم دا نور اول ہے بعد اچ کُل کائنات بݨی

ہک سچے مسلمان دی حیثیت نال دلنورؔ نور پوری حج وی کرݨ چاہندن اُنھاں دی دِلی خواہش اے جو اُنھاں کوں مکہ تے مدینے دی زیارت نصیب تھیوے او اللہ دا گھر ݙیکھن اتے اوندے پیارے محبوبﷺ دے روضے دی زیارت کرن۔ اُنھاں اپݨی ایں خواہش کوں لفظاں دا چولا پوا کراہیں ایں طرح بیان کیتے:

بے پر ہیں ساݙے پر کائنی پر ہوندے اُݙ تے آویندے

تیݙے در اقدس دی چوکھٹ کوں ݙے بوسے مونجھ لہا ویندے

رحٖ رحٖ تے وصل وصال تھیندا اکھیاں کوں حج کروا ویندے

دلنورؔ مبارخ جڳ ݙیندا تیݙے رنگ توں دِل رنگوا ویندے

ہر مسلمان اللہ تے اوندے رسول نال بے پناہ محبت رکھیندے اتے ایندے نال نال رسول پاکؐ دے گھراݨے نال وی دِلی عقیدت رکھیندے ۔ اہل بیت نال محبت ہر مسلمان دے ایمان دا حصہ ہے ۔ حضرت علیؑ ، خاتونِ جنت حضرت فاطمہ ؑ اتے جنت دے سردار حضرت امام حسنؑ اتے حضرت امام حسینؑ نال محبت دلنور نور پوری دے سرائیکی ݙوہڑیاں وچ کئی جاہیں تے ݙٹھی ونڄ سڳدی اے ۔ اونویں وی ساݙے سرائیکی وسیب وچ اہلِ بیت نال محبت ٻہوں زیادہ پاتی ویندی اے ۔ پنجتن پاک نال محبت دے حوالے نال دلنور نور پوری دا اے ݙوہڑہ ݙیکھو:

جڳ اہدا ہے ہر رُت توں ودھ رُت مست بہار وݙی شئے ہے

بے گھر دی کئی اوقات نہیں اپݨا گھر بار وݙی شئے ہے

کئی دولت کوں ترجیح ݙیندن کُئی اَہدے پیار وݙی شئے ہے

دلنورؔ اکھیندے پنجتن دا جو ہے حبدار وݙی شئے ہے

اللہ دی ذات تک پُڄݨ واسطے اتے نبی پاکؐ دی ݙسی ہوئی راہ تے چلݨ واسطے کہیں تکڑے رہبر دی لوڑ ہوندی اے ۔ جیڑھا ہتھ پکڑ تے سدھے رستے تے ٹورݨ دی صلاحیت رکھیندا ہووے ۔ اینکوں مُرشد کامل آہدن۔ ہر مسلمان دی اے خواہش ہوندی اے جو اونکوں مرشد کامل مِل پووے تاں جو اوندی اڳوں دی منزل آسان تھی پووے ۔ اونکوں ایں دُنیا اتے اڳلی دُنیا وچ کامیابی واسطے مُرشد کامل دی لوڑ ہوندی اے۔ ایں سانگے مُرشد کامل دی ڳول وچ اکثر لوک اپݨی ساری حیاتی لنگھا ݙیندن ۔ دلنورؔ نور پوری وی اپݨے دِل وچ ایجھے مُرشد کامل دے مِلݨ دی خواہش رکھیندن اتے منزل تئیں پُڄݨ واسطے ہوں مُرشد کامل دی تلاش وچ رہندن ۔ ایں حوالے نال اُنھاں دا اے ݙوہڑہ ݙیکھو:

بِن مُرشد منزل نئیں مِلدی لبھ مُرشد منزل تاں مِلسی

جیویں آکھے مُرشد کر اُونویں کیتو عمل تاں سُکھ دی چھاں مِلسی

سب پردے تئیں توں ہٹ ویسن ہر مسئلہ عین عیاں مِلسی

دلنورؔ جے مُرشد کرم کیتا پچھے مُٹھ وچ جُمل جہاں مِلسی

ٻِیا ݙیکھو

• دلنور نور پوری دا سرائیکی لوک ݙوہڑا

• وسیب، ثقافت اتے دھرتی نال محبّت دا ݙوہڑا

• سرائیکی لوک شاعری وِچ پورھیے دا درس

• دِلنور دے لوک ݙوہڑے وِچ خود داری تے غُربت

• سادے جئیں بندے دی سرائیکی لوک شاعری

ٻاہرلے جوڑ

• ڈاکٹر خالد اقبال صیب دی لائبریری دا ٻِیا مواد۔ ۔ ۔ ۔ ۔