سرائیکی لوک شاعری وِچ پورھیے دا درس

وکیپیڈیا توں

دلنور نور پوری ہک محنتی انسان ہئی ۔ اوں ساری زندگی محنت مزدوری کرتے اپݨے ٻالاں دا پیٹ پالیے۔ کہیں دے اڳوں ہتھ نسی اَݙیا ۔ حالات جیجھیں وی ریہن اوں جوان دے پُتر نہ کݙاہیں ہمت ہاری اے اتے نہ مونجھا تھئے۔ اوندی سرائیکی لوک شاعری وچ وی ساکوں جاہ جاہ تے محنت دا درس مِلدے۔ او چاہندن جو سرائیکی قوم محنت کر تے اپݨے پیراں تے کھڑی تھیوے اتے ٻیاں قوماں دا مقابلہ کر سڳے۔ محنت دے حوالے نال اُنھاں دا اے ݙوہڑہ ݙیکھو:

ساکوں رب سئیں عقل شعور ݙتے کر سوچ وچار تے کھاندے ہئیں

اساں ٻے دی ماری نی کھاندے اساں اپݨی مار تے کھاندے ہئیں

اساں لوک نکمے آلسی نی کر کاروبار تے کھاندے ہئیں

دلنورؔ حرام دے کھاوݨ توں ونڄ جھُوٹے دار تے کھاندے ہئیں [١]

دلنورؔ نورپوری دے سرائیکی لوک ݙوہڑے وچ ساکوں اخلاقی اتے اصلاحی رنگ نشابر نظر آندے۔ او چاہندن جو اُنھاں دی سرائیکی قوم اپݨے کردار اتے اخلاق دے حوالے نال ہک بہترین قوم بݨ ونڄے۔ اُنھاں دے اندر موجود بھیڑ چنگایاں وچ بدل ونڄن ۔او اپݨی سرائیکی قوم کوں غیرت اتے خوداری دا درس ݙیندن۔ او چاہندن جو دُنیا وچ سرائیکی قوم اپݨے چنگے ڳُݨاں پاروں ڄاتی سُنڄاتی ونڄے۔ اخلاقی اتے اصلاحی حوالے نال اُنھاں دے اے ݙوہڑے ݙیکھو:

جے چین سکون دی لوڑھ ہووی ہئی چین سکون نماز دیوچ

اونکوں ہرگز چین نئیں مِل سڳدا جیڑھا رہندے فخر غماز دیوچ

جے عزت چہندیں اِتھ اُتھ دی ہئی عزت عجز نیاز دیوچ

دلنورؔ میاں جئیں میں کیتی او ماریا ڳیا ہیں ناز دیوچ [٢]

"انسانی روئیے" وی دلنورؔ نورپوری دے سرائیکی ݙوہڑیاں دا ہک خاص موضوع اے ۔ انسانی روئیاںدا گہرا مشاہدہ ساکوں اُنھاں دے ݙوہڑیاں وچ واضح نظر آندے۔ او انساناں دے رویاں دی یکسر تبدیلی کوں برداشت نی کر سڳدے ۔ کہیں کہیں ویلے تاں ایں تبدیلی تے مونجھے تھی ویندن اتے کہیں کہیں ویلے اُنھاں دے لہجے وچ کاوڑ اتے کَوڑ وی آ ویندی ہے۔ او ہک سچے اتے کھر ے انسان ہن ۔[٣] ایں واسطے اُنھاں کوں منافقت اصلوں نی بھاندی انسانی روئیاں دے حوالے نال اُنھاں دا اے ݙوہڑہ ݙیکھو:

بݨ زوریں ایجھے یار ویندن بُھلوا رشتہ ہر ہک گھِندن

پڑھ آندن سبق سیاست دا ݙکھلا لحظے دی سِک گھِندن

ہے مطلب جیلے نِکل ویندا راہ وچ دیوار کھرک گھِندن

دلنورؔ محل تے چاڑھ کرائیں تلوں بھڄ تے پوڑی چھک گھِندن [٤][٥]

ٻِیا ݙیکھو[لکھو | ماخذ وچ تبدیلی کرو]

حوالہ جات[لکھو | ماخذ وچ تبدیلی کرو]

  1. دلنور نور پوری، متاں مِل پووے، جھوک پبلشرز ملتان، ۲۰۰۶ء، ص ۹۷
  2. دلنور نور پوری، متاں مِل پووے، جھوک پبلشرز ملتان، ۲۰۰۶ء، ص ۸۵
  3. از: عصمت اللہ شاہ ۔ ڳول پھرول لِکّھت: "دل نور نور پوری دا سرائیکی ݙوہڑا"۔ ریسرچ جنرل "نڳال-2" (سرائیکی)۔ سرائیکی ایریا سٹڈی سنٹر، بہاء الدین زکریا یونیورسٹی ملتان جولائی تا دسمبر ٢٠١٩ء تُوں چَھپّے ہوئے تُوں آرکائیو تِھیا ہویا۔
  4. دلنور نور پوری، متاں مِل پووے، جھوک پبلشرز ملتان، ۲۰۰۶ء، ص ۴۹
  5. از: سئیں ڈاکٹر خالد اقبال۔ لائبریری۔

ٻاہرلے جوڑ[لکھو | ماخذ وچ تبدیلی کرو]