سرائیکی کالم نگاری

سرائیکی وسیب وِچ سرائیکی ٻولی دے صحافی جِہڑیلے کہاں وی اخبار، رسالے یا انٹر نیٹ اُتے بلاگ کِیتے جیڑھا کَم کار یا مضمون لکھین٘دے ہِن اُوکُوں ادب دی ٻولی وِچ کالم نگاری آکھیا وین٘دے ہِے۔ اِیہ سارے کالم / آرٹیکل صحافت دے وسیب نال ڳوڑھے تعلق اَتے مسئلے مسائل دے بیان دی پارُوں لوک ادب دا سرمایہ بݨ وین٘دے ہِن۔ اِیں پاروں سرائیکی لوک ادب وِچ سرائیکی کالم نگاری کُوں وی ٻہوں اہمیّت حاصل ہے اَتے اِنّھاں دے وِچ کالم لِکّھݨ والے بعضے جائیں تے لوک قصّے، لوک کہاݨیاں اَتے ٻیا مواد وی شامل کرین٘دے پئے ہون٘دِن۔

ادب تے صحافت دا ساک

لوک ادب تے صحافت دا رشتہ تعلق ٻہوں قدیم توں آندا پئے اتے کجھ لوک ایں ادب، صحافت کوں انڄ شمار کریندن۔ صحافت دا لفظ صحیفہ توں مشتق ہے۔ جیندے لغوی معنی رسالہ یا کتاب دے ہن۔ صحافت دا جو شعبہ، ادب دے ٻہوں قریب ہے او ایہو کالم ہے۔ کالم انگریزی زبان دا لفظ ہے جیندے لغوی معنی ہن ستون، کھمبا، منیار تے صفحے دا حصہ۔ صحافت دی اصطلاح وچ کالم دا لفظ ہک صفحے دے حصے اتے ݙوجھیاں مخصوص تحریراں کیتے استعمال کیتا ویندے۔ کالم کہیں مخصوص اسلوب اتے انداز نال لکھی ہوئی تحریر کوں وی آکھیا ویندے جیڑھی جو مستقل عنوان دے نال مستقل یا وقفے وقفے نال شائع تھیندی راہوے۔^[١]

کالم نگاری وِچ ملفوظات نگاری

سرائیکی ملفوظات نگاری یا سرائیکی فرمودات نگاری ^[١]وِچ ہک جملے وچ مختصر لفظاں دی دانش تے حکمت نال کیتی ڳئی ڳالھ کوں فرمودات، قول زریں آکھیا ویندے۔ انگریزی وچ اینکوں ’’کوٹیشنز‘‘ آکھیا ویندے۔ عربی وچ خلیل جبران دے دلچسپ اتے دل آویز اقوال ٻہوں مقبول ہن۔ اردو وچ واصف علی واصف دے اختصاریئے، دانش و حکمت دی مثال ہن۔ فرمودات، قول زریں، مختصر جملے یا مختصر پیرا گراف دی صورت وچ ہوندن۔ صوفیائے کرام دے مختصر اقوال جنہاں کوں ملفوظات آکھیا ویندے مثلاً ملفوظات شیخ فرید الدین شکر گنجؒ، فوائد الساکین، ملفوظات خواجہ نظام الدینؒ، راحت القلوب۔ ’’فرموداتِ فریدؒ‘‘جینکوں ڈاکٹر طاہر تونسوی نے مرتب کیتے، چھپ تے سامݨے آئن۔^[١]