سرائیکی ادب ٹور تے پندھ
ڈاکٹر سجاد حیدر پرویز دی کتاب "سرائیکی ادب ٹورا تے پندھ" (1980 تا 1995ء) دے سرائیکی لوک ادب دا جائزہ ہے ایں کتاب وچ 16 سال دے دوران چھپݨ والیاں کتاباں دا تعارفی تذکرہ موجود ہے۔ چھ سو بتری (632) صفحات اُتے مشتمل ایہ ضخیم کتاب، اکتوبر 1996ء وچ ’’ مجلس سرائیکی مصنفین پاکستان، چغتائی بلڈنگ بلوچ نگر، مظفر گڑھ دی طرفوں چھاپی ڳئی ہے۔ ایں کتاب بارے ڈاکٹر انعام الحق جاوید، لکھدن۔
"سجاد حیدر پرویز نے سرائیکی ادب دی تاریخ تے تحقیق دے حوالے نال آپݨا ہک منفرد مقام بݨا گھدے تے اَڄݨ ایندا سفر رکیا نی۔ میکوں امید اے جو اگوں ونج کے سرائیکی ادب دی تاریخ تے تحقیق دے پاروں ایندا ناں ہک حوالے حیثیت اختیار کر ویسی"[١]
ایندے وچ کجھ شک نھیں، ڈاکٹر سجاد حیدر پرویز سرائیکی لوک ادب دے اُنھاں سانبھݨ ہار، مہاندرے لوکاں وچوں ہن،جنہاں سرائیکی ادب دیاں چھپݨ والیاں شعری و نثری کتب، تبصرہ، تذکرہ نویسی ، شخصیات نگاری، ادبی اصناف دے جائزے، ادبی کانفرنساں، تقاریب، ادبی اجلاساں دی روداد، الغرض ادبی تاریخ واقعات کوں تحریری دستاویزی شکل ڈے تے۔ مستقبل دے محققین و مورخین دے کیتے دَگ کوںپَدھرا کیتے۔ ایہہ ہک صبر آزما اتے دقت طلب تحقیقی کم ہئی جینکوں انہاں ٻہوں محنت نال توڑ پجائے۔ در حقیقت انہاں سرائیکی ادبی تحقیقی پور ھیئے دی بنیاد، سرائیکی ادب دے سال پسالی ادبی جائزیاں توں کیتی ہائی۔ اتے ایہ ادبی جائزے، ہر سال دے چھیکڑ تے اخبارات دے ادبی صفحات دی زینت بنڑدے ہن۔ جیندے وچ ہک سال دے دوران چھپن والیاں شعری و نثری کتاباں، کانفرنساں تے ریڈیو، ٹی وی دے ادبی پروگراماں بارے معلومات، تاثراتی تبصرے دے نال شامل ہوندیاں ہن۔ ایہیے بنیادی معلومات، تاثرانی تنقید، تبصرے جائزے، کتب شماری تے تذکرہ نویسی تے تاریخ نویسی دے منڈھلے نقش ونج بݨیندن۔
ڈاکٹر سجاد حیدر پرویز دی کتاب "سرائیکی ادب ٹور تے پندھ" مندرجہ بالا توجیہات دی دستاویزی شہادت ہے۔[٢]
ٻیا ݙیکھو[لکھو | ماخذ وچ تبدیلی کرو]
حوالہ جات[لکھو | ماخذ وچ تبدیلی کرو]
- ↑ ڈاکٹر انعام الحق جاوید، ’’سرائیکی ادب ٹور اتے پندھ‘‘، مجلس سرائیکی مصنفین پاکستان ، چغتائی بلڈنگ بلوچ نگر ، مظفرگڑھ ، اشاعت اکتوبر 1994ء ،ص : 5
- ↑ از: سئیں ڈاکٹر خالد اقبال۔ مقالہ پی ایچ ڈی۔