سرائیکی ادب وچ معنی دا پندھ

اسلم رسول پوری دی کتاب "سرائیکی ادب وچ معنی دا پندھ" سال 2014ء وچ ، سرائیکی پبلی کیشنز رسول پور دی طرفوں 500 دی تعداد وچ چھاپی ڳئی ہے۔ کُل صفحات دی تعداد 496 ہے ۔ ایہ کتاب مصنف دے تحقیقی و تنقیدی مضامین دا مجموعہ ہے جینکوں سرائیکی لوک ادب دی ہک اہم دستاویز اَتے جزوی تاریخ وی آکھ سگدے ہیں۔ مصنف نے ایں کتاب وچ چالہی سالہ سرائیکی ادب دا جائزہ ہک محقق و تنقید نگار دی حیثیت نال گھدے تے مصنف سرائیکی زبان و ادب دے بنیادی مسائل و مباحث دی عملی جدوجہد دا حصہ رہیئے ۔ اتِ واسطے اُنہاں دی حیثیت شریک عمل مورخ دی ہے ۔ کیوں جو مصنف زبان دے متفقہ لفظ سرائیکی ، ایندی املا، ایندے رسم الخط دے جوڑ ٹھہا دیاں کوششاں، سرائیکی وچ تلفظ دے مسائل، گمنام سرائیکی شاعراں دی دریافت تذکرہ نویسی ، ماہر لسانیات، مورخ، محقق اتے تنقید نگار دی حیثیت نال ٻہوں  معتبر حوالہ ہن۔

سئیں اسلم رسول پوری نے 1970ء دے ݙہاکے کنوں سرائیکی ادبی تنقید لکھݨ دا مُنڈھ ٻَدھا۔ "تلاوڑے"، "نتارے"، "لیکھے" انہاں دیاں اینجھیاں تنقیدی، تحقیقی کتاباں ہن، جنہاں دے راہیں اسلم رسول پوری نے سرائیکی ادب دی رفتار، عہد بہ عہد ادبی منظر نامے ، لسانی تبدیلیاں، شعری و نثری مزاج وچ صنفی تجربات، کلاسیکی شعر و ادب کی تفہیم، تعبیر و تشریح، نویں تخلیق کاراں دی حوصلہ افزائی تے سرائیکی تنقید کوں انگریزی و اردو ادب توں آوݨ والے نویں رحجانات اتے نظریات دی گول پھول نال رلاتے ڈٹھے۔

اسلم رسول پوری دے تنقیدی تحقیقی مضامین تاریخ نگاری دے تناظر وچ قابل قدر اہمیت رکھدن تے اُنہاں دے تحقیقی تنقیدی مضامین توں صاحب طرز نقاد دا استدلالی نقطہ نظر وی سامݨے آندے۔

"سرائیکی ادب وچ معنی دا پندھ" اسلم رسول پوری دی تحقیق تے تنقیدی کتاب دے نال نال اہم دستاویز ادبی ہے ۔

سئیں اسلم رسول پوری نے ایں کتاب دے دیباچے وچ اپݨا  نقطہ نظر تفصیل نال بیان کیتے۔

ٻیا ݙیکھو

• اصنافِ سُخن دا جائزہ تے سرائیکی شاعری دا ارتقاء

• سرائیکی شاعری دا ارتقاء وِچ ادوار بندی

• ادبی تاریخ نویسی وِچ سرائیکی شاعری دا ارتقاء

• نصر اللہ خان ناصر دی تحقیق

• سرائیکی شاعری دا ارتقاء وِچ تنقید تے تحقیق

ٻاہرلے جوڑ

• سئیں ڈاکٹر خالد اقبال دی لائبریری ݙیکھو

• سئیں ڈاکٹر خالد اقبال دا تعارف انگریزی وِچ

• ڈاکٹر خالد اقبال صیب دی لائبریری دا ٻِیا مواد۔ ۔ ۔ ۔