رفعت عباس دی سرائیکی لوک شاعری

رفعت عباس دا اصل ناں غلام عباس ہے ۔ آپ1957ء اِچ ڄمے، زندگی ملتان تے اوندے ارد گرد اِچ گزردی رہ ڳئی اے۔ اُنہاں دی لوک شاعری نے، سرائیکی زبان کوں اعلیٰ شاعری ، نویاں ہئیتاں تے الفاظ دا نواں نظام عطا کیتے ۔ اُنہاں دی شاعری نے  قاری تے سامع ڈوہائیں کوں آپ دو متوجہ کیتے ۔

دِل تاں آہدے پُھل کوں رفعتؔ نیڑے تھی کر ݙیکھوں

ایں تے پر، جو، تتلی ٻیٹھی، اِیہا اُݙ ونڄݨی ہے

ایں شعر کوں پڑھ تے اَتے اے اندازہ کرݨ کئی زیادہ مشکل نئیں جو ، جیڑھا شخص ، ہک تتلی کوںوی خوفزدہ نئیں ݙیکھ سڳدا ،او، خود غاصباں ، ظالماں تے دہشت گرداں دے زمانے وچ کیڑھے کرب توں گزردا پیا ہوسی ۔ اُوں وسیب اِچ جتھاں اوندی ذات دا اعتراف نئیں تھیندا پیا ، اُتھاں او ’’تتلی دی ذات‘‘ دا اعتراف کرتے ، ہک مثبت پیغام ڈیندا بیٹھے۔

سرائیکی وسیب اِچ ’’بندے دا ، اعتراف‘‘ تاں اپݨی جھاہ  ، اِتھاں تاں سرائیکی زبان دا اعتراف اعتراف، شناخت ٻہوں وݙا مسئلہ رہ ڳئی اے ۔ ’’اپݨی شناخت تے اپݨی ذات دے اعتراف ‘‘ دی خواہش اڄوکے دور دا ہک ٻہوں وݙا مسئلہ رہ ڳئین ۔ مغرب اِچ ایں مسئلے کوں حل کرݨ سانگھے ’’فلسفہ وجودیت‘‘ پیش کیتا ڳیا ۔ رفعت عباس دی شاعری اساکوں وجودیت تے ا نسان دوستی دیاں قدراں کوں ورتیندی نظر آندی ہے

اِیں ساری صورتحال دا مقابلہ کرن سانگھے ،جیڑھے ملک اپݨی قوم دی شناخت کوں محفوظ کرݨ دی کوشش کریندن ، او ݙکھ  تاں ڈہیدن ، پر، او ، حُر ، وی سݙویندن ۔ رفعت عباس وی ایں فکر کوں وسیب دے سامݨے پیش کریندن ۔ آئو اُنہاں دی شاعری دا فنی تے فکری مطالعہ کریندے ہیں۔ میݙے زیر مطالعہ اُنہاں دیاں درج ذیل کتاباں ہِن:۔

1. پڑچھیاں اُتے پھُل          1984
2. جھومری جھوم ٹُرے          1989
3. بھوندی بھوئیں تے         1995
4. سنگت وِید                 1997
5. پرو بھرے ہِک شہر، اِچوں   2002
6. عشق اللہ سئیں جاگیا        2005
7. مُکھ آدم دا۔          2009  

جیڑھے قتل تھئے اُنہاں پُھل پاتے

…………

جیڑھا قتل تھیا، اوندی گاٖلھ ٹُری

ایں گاٖلھ وچوں، کوئی عاشق ہے

جیں لاتا ہے، ساکوں رنگ آ، تے

جیڑھے قتل تھئے، اُناں پُھل پاتے

اُنہاں دا سیاسی شعور ٻہوں پختہ تے کامل تھی چکے ۔ او ، ہُݨ ، مسائل تے چُپ نیں راہندے بلکہ اُنہاں مسائل تے اوندی وجوہات دی نشاندی وی کریندن۔

کون مناوے ساوݨی

شہر دے ٻاہروں چھاوݨی

ڈگھن پورب  نِت گُھلے

ہِیل  نہ ویڑھے آوݨی

شہر دے ٻاہروں چھاوݨی

او سمجھیندن جو حکمران عوام تے اداریاں کوں اپݨی اپݨی حدود اِچ رہ کے کم کرݨا چاہیدے ۔ عوام ،اپݨے وسائل  نال، اداریاں کوں ایں واسطے باوسیلہ بݨیندی ہے جو، او، ادارے ملک دی ترقی تے فلاح دے کم کرݨ ، کہیں ادارے کوں ایں نئیں کرݨا چاہیدا جو او عوام دی طرفوں ݙتے ڳئے وسائل دے زور تے ولدا عوام تے حکمرانی شروع کر ݙیوے۔

ٻیا ݙیکھو

• سرائیکی وسیب دی ثقافت تے دانشور

• اشو لال فقیر دی لوک شاعری

• جہانگیر مخلص دی لوک شاعری

• چولستان دی لوک شاعری دی اَواز

• ارشاد تونسوی دی لوک شاعری

ٻاہرلے جوڑ

• ڈاکٹر خالد اقبال صیب دی لائبریری دا ٻِیا مواد۔ ۔ ۔ ۔