ملک آڈھا خان گنجیال

ملک آڈھا خان، ٤ اپریل، ١٩٤٤ء کُوں ضلع خوشاب دے شاہر گنجیال وِچ ڄمے- آڈھا خان ہِک مشہور مذہبی گھر نال تعلق رکھیندے ہن- ملک آڈھا خان دے اٻا سئیں دا ناں ملک شیر محمد گنجیال ہئی- آڈھا خان پہلا ݙوھڑا، ١٩٦٠ء وچ آکھا ہئی، جݙاں او اَٹھویں جماعت وچ پڑھدے ہَن- ملک آڈھا خان، پڑھائی توں فارغ تھئے تاں کُجھ عرصے کَݨ درس و تدریس نال وابستہ تھی ڳے-

شاعری

ملک آڈھا خان دی پنجابی شاعری دا جئیں ویلے عروج ہا، عطاء اللہ عیسیٰ خیلوی ١٩٧٢ء وچ آڈھا خان دے گھر، گنجیال شریف تشریف گھن تے آئے اتے انہیں دے کلام کُوں لالہ عطاء اللہ عیسیٰ خیلوی نے ریڈیو پاکستان، بہاولپور اتے ملتان دے اسٹیشناں تے ڳایا اور جڳ تے ہُل ڳے- لالہ عطاء اللہ عیسیٰ خیلوی دا کوئی ڳاوَݨ ای ہوسی جیندے وچ آڈھا خان دا ݙوھڑا نہ ہووے-

نمونہ کلام

تیکوں پُھل وانگوں پروان چڑھایم

بھانویں اڄ میکوں نگہبان نہ من

دربان تاں من

اوہے حلفیہ قول نِبھا جانی

میݙے نال کیتے پیمان نہ من

قرآن تاں من

جئیں تاج پواۓ تیکوں شہرت دے

اوں محسن دے فرمان نہ من

احسان تاں من

ایݙی نفرت کر نئیں آڈھے توں

بھانویں شان برابر شان نہ من

انسان تاں من

عطاء اللہ عیسیٰ خیلوی نال تعلق

عطاء اللہ عیسیٰ خیلوی تے آڈھا خان ہِک ٻئے دے بڑے چنڳے سنڳتی ہَن، عطاء اللہ عیسیٰ خیلوی، ہک واری ملک آڈھا خان دے پُتراں دے پرنیوے تے وی ڳاوݨ کیتے ڳے ہَن اتے آڈھا خان دی وݙی عزت کریندے ہَن-

شعری مجموعے

ملک آڈھا خان دا پہلا شعری مجموعہ ہئی "ڄامِ شوق"- اگر اساں مقبولیت دی ڳال کروں تاں "داستانِ سَسی"، آڈھا خان دا سب کنوں ڈھیر مشہور شعری مجموعہ ہے-

ݙوہڑے

عطاء اللہ عیسیٰ خیلوی دے ڳائے ݙُو مشہور ݙوھڑے:

وے میں تے ہے پردیس دی شام پہلاں، اُتّوں توں وت پیار دی شام نہ کر

تیݙی محفل وچ میݙا ناں راہوے، توڑے پیار دے ہور انعام نہ کر

لکھ ظلم و ستم تے شکوے کر، درپردہ کر سرِ عام نہ کر

آڈھا فرقت ݙے بھان٘ویں جشن منا، سو واری لڑ اعلان نہ کر، بد نام نہ کر

ٻیا ݙوھڑا:

میں تھوں ساری دنیا پُچھدی اے، کیویں دِلبر تے تھو رُٹھا

بے جرم سانُوں معلوم تھیندیں، کئیں چکر چلایا ای پُٹھا

تیݙے مُن٘ہ چُوں شِکوہ سُݨیا نئیں، توڑے مُدت دا وتنائیں مُٹھا

رب ڄاݨے کہہ جیاں قاتل ہے، جِس آڈھے خان نُوں کُٹھا

نعتیہ کلام

ملک آڈھا خان نے نعت وی لکھی تے لا تعداد شعر نبی آخرالزماں، حضرت محمدِ مصطفیٰ صلی اللہ علیہ و آلہٖ و سلم دی شان وچ آکھے- ١٩٨٦ء وچ ملک آڈھا خان جݙاں مدینہ شریف ڳے، تاں روضہ رسول دے سامݨے ٻہہ تے آپݨا نعتیہ کلام، "رموزِ عشق" مکمل کیتا-

ٻیاں کتاباں

اوں تاں آڈھا خان دی ڈھڳ شاعری، عطاء اللہ عیسیٰ خیلوی ڳاندے رہ ڳن پر آڈھا خان دی شاعری کتابی شکل وچ وی موجود ہے- آڈھا خان دیاں مشہور کتاباں، "راز و نیاز" اتے "انتخاب از کلام ہِن"-

وفات

آپ دا وصال ٤ مئی ٢٠١٢ء کوں ٦٨ سال دی عمر وچ تھیا-