ملتان دے ݙو دستکار خطاطاں دا تعلق
حضرت حافظ بشیر احمد قریشی العراقی دی خطاطی دا چرچا صرف ملتان اِچ نہ ہَا۔ بلکہ ٻنھاں شہراں اَتے ملکاں اِچوں ذوق آلے لوک تبرکاً اُنہاں کنوں آپݨی ضرورت دے لفظ لکھوا ویندے ہَن۔ اُنہاں دا اے شغل ہئی کاروبار ٻیا ہئی‘ چکی لائی ہوئی ہئی اَٹا پیوھݨ دی اُنہاں نے سارے گھرانے دے بڄلیاں دے ٻل اَتے ٻئے خرچے خود کرنے ہوندے ہَن۔ ڄے تئیں حیات ریہے خاندان آلیاں کوں کوئی فکر انہاں ڳالھیں دی نہ ہوندی ہئی۔ پوری عمر نیکی اَتے پارسائی دے نال اللہ تعالیٰ اَتے اُوندے رسولِ مقبول ﷺ دی رضا دے مطابق گزاری اَخیر 5رمضان المبارک کُوں روزہ افطار کر کے مسجد اِچ نماز پڑھا کے گھر آئے وت عشاء ویلے نال مسیت اِچ جماعت کرویندے ہن نماز پڑھاوݨ ڳئے سِر سجدے اِچ ہئی ڄو ملک الموت سئیں عزرائیل علیہ السلام نے حکم ربی پورا کریندے ہوئے روح گھن گِدی۔ اِنَّا للہ ِ وَ اِنَّا اِلیہِ راجِعون
ایں مضمون اِچ حضرت حافظ بشیر احمد قریشی العراقی ؒ دی ترتیب ݙتی ہوئی آپݨے بزرگاں دے بارے اِچ لکھی ہوئی قلمی کتاب ’’گلستانِ موسوی صدیقی ملتانی‘‘ توں وی واقعات گِدے ڳین۔ رجسٹر سائز دے سو صفحات دی ایں کتاب دی کتابت ہولڈر نال خوش خط تھئی ہوئی ہِے ڄیڑھی ڄو حضرت حافظ بشیر احمد سئیں دی ݙسی ڳئی ہِے۔
حضرت حافظ بشیر احمد دے صاحبزادے پروفیسر حبیب احمد دی شادی 1994ء اِچ تھئی تاں حضرت محمد حسن خان کلیم رقم نے خوبصورت تحریر اِچ سہرا پیش کیتا ہئی ڄیندی کاپی موجود ہِے۔
سہرے تُوں ݙو شعر:
الحمد بے شمار بنا ہے عجیب سہرا
رخ پر سجا ہے دولہا کہ یہ حبیب سہرا
نکلے نہ مرحبا کیوں بے ساختہ زباں سے
لکھا کلیم نے ہے عجیب و غریب سہرا
وَت ڄݙاں پروفیسر حبیب احمد صاحب کوں اللہ تعالیٰ نے پہلا پُتر عطا کیتا تاں محمد حسن خان کلیم رقمؔ نے آپݨے اُستاد زادے دی خدمت اِچ ہک تہنیت نامہ لکھ تے پیش کیتا ڄیڑھا کتابت آلی سیاہی نال لکھ تے سنہرا کیتا ہویا ہِے۔ ݙو شعر ایندے اِچوں:
خلد سے حوروں نے بھیجی ہے یہ فرخندہ نوید
حق نے بخشا ہے حبیب احمد کو بھی خلفِ رشید
ماں باپ کی اُمید کا حاصل ہُوا روشن گُہر
جس کی ہر ایک چمک برق صفت‘ قابلِ دید
اِیں تہنیت نامے تے تاریخ 21نومبر 1965ء درج ہِے۔ اَتے پیش کردہ اِچ خاکپائے چشتیاں محمد حسن کلیم خوشنویس شاگردِ رشید حضرت حافظ بشیر احمد صاحب ؒ آخر اِچ درج ہِے۔ اے ݙوہیں تحفے بشیر حسین قریشی سئیں کول محفوظ ہِن یعنی آپݨے اَبَّا جی دی شادی دا سہرا وی اَتے آپݨے ڄمݨ تے اے تہنیت نامہ وی او لوک وݙے سمجھدار ہوندن ڄیڑھے اینجھیاں شئیں سنبھال رکھدِن۔ اے ساݙا ورثہ ہِے، ساݙی بنیادہِے، ساݙی اساس ہِے۔[١]
ٻِیا ݙیکھو
[لکھو | ماخذ وچ تبدیلی کرو]حوالہ جات
[لکھو | ماخذ وچ تبدیلی کرو]- ↑ از: "ابن کلیم" "ملتان دے لوک فنون وِچ روائتی خطاطی دا ارتقاء" (١٩٧٠ء تُوں پہلاں)، باہتمام: دبستان فروغ خطاطی (رجسٹرڈ)۔ (غیر مطبوعہ سرائیکی مقالہ)۔