سرائیکی لوک ݙوہڑے وِچ محبّت

سرائیکی وسیب اِچ محبّت دا، ہِک رنگ، محبوب تے محبّ دا، ہِک ٻئے کُوں تحفے ݙیوݨ ہِے۔ محبّت دے اِیں تحفے (سوکھڑی) کُوں، نشانی، آکھیا وین٘دے۔ اِین٘دا بنیادی طور تے مقصد اے ہون٘دے، جو جئیں ویلھے وی ہِک شخص اُوں نشانی کوں ݙیکھسی تاں اُوکوں ݙوجھا یار، یاد آ ویسی۔ اِیں واسطے اِیں سرائیکی وسیب اِچ ہِک ٻئے تُوں نشانی منڳݨ، یا ہِک ٻئے کُوں نشانی ݙیوݨ، محبّت دی علامت سمجھیا وین٘دے۔ اِیں سان٘ڳے سئیں عبدالرزاق سالک الین٘دِن:

ہِن لکھ تیݙے احسان سڄݨ، پٹھیے پوپہ تئیں، تیݙا ناں تھیسی

ناں گِھندے کون سُنارے دا، اِیکوں جوڑیے جئیں، تیݙا ناں تھیسی

کہیں حق ہمسائی دے میل اُتے، جݙاں پیاں میں، تیݙا ناں تھیسی

اے وسبہ سالک تیݙا ہِے، اساں تیݙے ہیں، تیݙا ناں تھیسی

محبوب نال، محبّت دے اظہار دا ہِک طریقہ اے وی ہِے جو اوکوں اے ݙسایا وین٘دے، جو اُوکوں کلّہا محبّ اِی پیار نئیں کرین٘دا، بلکہ اُوندے نال منسلک اوندیاں، چیزاں، مال منگھی، ٻیٹ، گھر، گھر دے تھاں تَھپّے، زیور، تریور، سبھے پرِیت کرین٘دِن۔ اِیں سان٘ڳے ہِک ٻیا لوک ݙوہڑا ݙیکھو:

جِتّھوں خس خیرات دا، نئیں مِلدا، کھڑوں جھولی جَھل، ساݙے کہیں لیکھے

ساکوں لوڑ ہِے قطرے قطرے دی، ہووے پار، دو، چھل، ساݙے کہیں لیکھے

منگوں اَڄ دی روٹی حاتم توں، آکھے اَڄ، نہ، کل، ساݙے کہیں لیکھے

ساݙے سِر، دی سبقت چھاں کئینی، اوندے شیش محل، ساݙے کہیں لیکھے

وݙیرے دی لوبھ اِیں وسیب کُوں حالی تئیں خستہ حال کر کے رکھیا ہوئے۔ وݙیرہ، اتنا طاقتور ہِے جو او قانون تے ضابطیاں دا نا صرف مذاق اُݙین٘دے، بلکہ کہِیں وی سڄاک ذہن کُوں قانون دے زور تے نا صرف مڄبور تے بے وَس کرین٘دے بلکہ تھاݨے کچاہری دے ذریعے اُوکُوں ذلیل تے رُسوا کرین٘دے۔ سوجھل ذہین، اوندیاں اے چلاکیاں ݙیکھ تے سوائے اللہ سئیں کُوں یاد کرݨ دے کُجھ وی نئیں کر سڳدے۔ اِیں بارے سئیں عبدالرشید اُشتر آہدے ہِن:

او، سب کچھ گِھن ڳئے، سب کہیں دا، جئیں اپݨا، پا، نئیں ویچا

اُوں مُکھ گِھدن، اُوں مِلک گھدِن، اُوں مال متال، نئیں ویچا

اُوندا ترس ہا، دارو، دردیں دا، بے درد، دوا، نئیں ویچا  

بھوئیں ساریں، اُشتر مُل گِھن ڳئے، آسمان خُدا نئیں ویچا

ٻیا ݙیکھو

• سرائیکی لوک ݙوہڑے دے موضوعات۔

• سرائیکی لوک ادب وِچ ݙوہڑا۔

• اڄوکے دور دا ݙوہڑا تے لوک ادب۔

ٻاہرلے جوڑ

• سئیں ابنِ کلیم احسن نظامی دی لائبریری ݙیکھو۔ ۔ ۔ ۔ ۔ ۔ ۔