سرائیکی تحریک دی کتھا
شاہین صاحب دے کٹھے پیپلز پارٹی چھوڑ کیں سرائیکی بنڑیئے ھاسے پونم اچ ای شاہین صاحب دے کٹھے ھاسے تاج خاں گواہ اے رہوکی سندھ اچ فاضل راھو دیاں برسیاں وی بھگتائینسے حیدر بخش جتوئی دے برسیں تیں وی حاضریاں ڈتینسے اسلم رسولپوری استاد احمد دے کٹھے کلھا جھنڈا چاتیں ترائے دے ترائے بندیں نال جامپور چوک تیں بریسٹر تاج محمد خاں لنگاہ دا استقبال وی کیتسے باضابطہ ایس کیو ایم اچ شامل تھی تیں رات ڈیہنہ کم کیتے بھرپور جوانی دا کجھ حصہ پیپلز پارٹی کوں ڈتے اوندے بعد بلکہ پیپلز پارٹی اچ رہندین ھوئیں استاد فدا حسین گاڈی دے کٹھے تونسے توں گھن بنگلے کورائی تئیں تیں بنگلے کورائی توں گھن کیں مہرےالے تک لوک سانجھ نال وی سفر کیتے منظور بوھڑ نال وی ڈھیر عرصہ کم کیتے ہنیں جیاہڑیں ساڈے وسیب غونث بخش بزنجو وی دورہ کیتاھا تاج خاں نال ھوندا ھا دیرہ غازیخاں اچ میڈے گھر میکوں وی چاہ دا شرف بخشا ھا اے ھن ساڈیاں گزریاں ویہانڑیاں اساں با ضابطہ کم ایس کیو ایم دے پلیٹ فارم سئیں حمید اصغر شاہین صاحب دے نال کیتا تیں اجاں تک ایمانداری نال کریندے ودے ھئیں کل وی سرائیکی ھاسے اج وی سرائیکی ھئیں مرسوں سرائیکی تھی تیں بلکہ سرائیکی دے جھنڈے اچ لپٹیچ تیں مرسوں وصیعت کرتیں مرسوں قبرتیں وی سرائیکی جھنڈا لگا رھے باقی سرائیکی تحریک اچ گرفتاریاں وی ڈتین سروی پڑوائسے خون وی ڈتے ہسپتال اچ داخل تھئیسے پل غازی گھاٹ وی بند کیتے دیرہ غازیخاں دا ہرروڈ وی بند کیتے دھمکیں دے باوجود جماعت اسلامی دے خلاف شدید احتجاج کیتے پروفیسر منور حسن دا پتلا وی ساڑیئے پل شوریہ تیں عمران خاں دا غائیبانہ نماز جنازہ ای پڑھوائے تونسے ونج کیں شدید مذاحمت دے باوجود عطا اللہ خان مینگل دا پتلا وی ساڑیئے ڈو قریبی عزیزیں دیاں بلوچستان توں لاشاں ای وصول کیتین دیرے وچ پرچے وی چاتن گرفتاریاں وی ڈتین جامپور دے مظاہرے اچ جیندابانی مبانی میں ہم پرائیوٹ اڈے تیں جلسہ نہ کرنڑ ڈتونے شدید احتجاج کیتوسے احتجاج اچ شاہین صاحب سید فرحت نقوی ظفر خاں لنڈ مرحوم کوں پولیس چاگئی اکھیں تی پٹی بدھ سندھ باڈر تیں کشمور دے نال چھوڑائے کامریڈ عبدالکریم ڈمرہ اللہ ڈتہ بدنام تیں ملک محمد نواز بھابھے کوں جیل بھیج ڈتونیں باقی اساں چار بندے پرچے الے باہرو بچ گیوسے ضمانتاں کریونسے میڈا ذاتی ڈالا ڈھک ڈتونے مہینہ سپرداری نہ تھئی فاضل پور اچ شاہین صاحب مجاھد جتوئی جمشید دھریجہ تیں میں فقیر کوں احتجاج نہ کرنرنڑ ڈتونے راتی رات ستیں ھوئیں کوں چا کیں ڈھک ڈتونیں کتھاں کتھاں پرچے نہ تھئے کتھاں کتھاں نہ ڈھکیوسے بحرحال نویں نسل کوں کجھ گالہیں ڈسنڑ بہوں ضروری ھن ہنڑ اسان تاریخ دے رحم وکرم تیں ھئیں امید اے ہنڑوی تحریک اچ قدم ڈو قدم اگو پیسو ھا ہیں ویلھے تک خبریں اخبار دا بائیکاٹ ثابت قدمی نال جاری اے ساڈے اتیں الزام لانونڑ کولھو پہلے تساں ایہو بائیکاٹ تیں کرو چا ہیں اخبار نیں توھاکوں را دا ایجنٹ اکھیئے بیخیر سرائیکی قوم زندہ باد سرائیکستان زندہ باد ۔۔۔۔اکبرخاں ملکانڑیں پاکستان عوامی سرائیکی پارٹی. (١٣ دسمبر ٢٠١٨ء)