سرائیکی اسمائے مکبّر
بعضے ویلے سرائیکی دے کئیں لفظ کوں'وݙائی'دے معنی ݙے کے'مکبّر'بݨا ݙِتا وین٘دے۔ مکبّر لفظ ہمیشہ مذکّر ہون٘دے تہوں بعضے ویلے مکبّر لفظ کُوں مذکّر تے مصغّر کوں اُون٘دی مؤنّث وسمجھ گِھدا وین٘دے۔ مصغّر تے مکبّر دے لفظ دے بعد اے ڄانݨ ضروری ہے جو او اصل لفظ کِہڑا ہے جین٘دے کنوں مکبّر یا مصغّر بݨایا ڳے۔ کیوں جو عام لوکاں کوں اصل لفظ دا پتہ نِھیں چلدا تہوں اُوکوں غلط سمجھ گِھدّا وین٘دے۔ مکبّر بݨاوݨ دے کُجھ قاعدے ایہ ہن:
- کئیں لفظ کوں وݙا بݨاوݨ کیتے اصل وچ موجود تانیث دی علامت'ی'کوں ہٹا کے آخری کنوں پہلے حرف اُتّے پِیش لا ݙِتا ونڄے۔ جیویں:
- ٹھِکری، ٹھِکُر۔
- ڈھینگری، ڈِھینگُر۔
- کھنگری، کھنگُر۔
- بعضے مؤنّث اسماں دی علامتِ تانیث 'ی' ہٹا کے اُو کوں مُکبّر بݨایا وین٘دے جیویں:
- مکھّی، مکھّا۔
- مکیڑی، مکڑا۔
- ٹوکری، ٹوکرا۔
- کُہاڑی، کُہارا۔
- مولھی، مولھا۔
- کوٹھی، کوٹھا۔
- بعضے اسماء بغیر کئیں قاعدے دے مکبّر بݨائے وین٘دن۔ جیویں:
- کاتی، کات
- کھَل، کھِلڑ۔
- تھپ، تھپوڑ۔
- دھَپ، دھپوڑ۔
- تھالی، تھال۔
- کڑاہی، کڑاہ۔
- گھاݨی، گھاݨ۔
- ماچہ، مچاݨ۔
- سُن٘ڄ، سُن٘ڄاݨ۔
- گھمس، گھمساݨ (وغیرہ وغیرہ)