سرائیکی اسمائے صفات
ایہوں جیہیں لفظ جِنہاں تُوں کئیں اسم کی حالت اصلیّت،وصبِ یا کُئی ٻئی خوبی ظاہر تھیوے،صفت سݙین٘دِں۔ صفت کئیں اسم کی حالت کوں محدود کت ݙین٘دی ہے۔ جیویں کالا بندہ،سوہݨاں ٻال،لمبی تریمِت،لال بوچھݨ،اِنہاں وچ کالا،سوہݨاں،لمبی،لال،صفتاں ہِن۔ صفت کئی قسم دی ہون٘دی ہے۔
- صفتِ ذاتی
- صفتِ نسبتی
- صفتِ عددی
- صفتِ مقداری
- صفتِ ضمیری
اِتّھاں اَساں صفتِ ذاتی دی ڳالھ کرین٘دے ہَیں جِیویں جو اُتے مثالاں ݙِتّیاں ڳیاں ہِن۔ صفتِ ذاتی بݨاوݨ دے کئی طریقے ہِن:
- سرائیکی اِچ ذاتی صفتاں دا اَنت کوئنیں۔ جیویں: سُکّا،موٹا،کَرن٘گاہ،ڈِھڈّل،کَملا،کُپّا،ٹکُریل وغیرہ۔ اے صفتاں کئیں وی اسم نال لائیاں وَنڄ سَڳدِن۔
- بعض صفتاں اسم یا فعل کنوں بݨدِن: کھیݙن کنوں،کھݙار پڑھݨ کنوں پڑھاکُو،نسّݨ کنوں نسوکڑ،اُݙّݨ کنوں لڄپال،
- بعضیاں صفتاں فارسی علامتاں نال رَل کے بݨدیاں ہِن: عقل ون٘د،بےشرم،ناشکُرا،بدبختا،بدزبان،بَدوَقرا،
- بعضیاں صفتاں عربی تے فارسی زباناں کنوں آئیاں ہِن: دَناء،احمق،شریف،خوش مزاج وغیرہ
- سرائیکی وِچ ذاتی صفت وی ہون٘دی ہے جیویں سوہݨاں بندہ،تقابلی صفت وی ہون٘دی ہے جیویں ماکھی کنوں مِٹھا اَتے ٻِنہاں سبھݨاں کنوں فضیلت صفت وی ہون٘دی ہے جِیویں ساریاں وِچوں چنڳاں،سبھݨاں کنوں سوہݨاں،ٻہوں چنڳاں،وݙار ذِیل،رَڄ کمینہ،اُصلُوں بھَیڑا،حَدّوں ٻاہر۔