بہاولپور ہاؤس، نویں دِلّی

بہاولپور ہاؤس نویں دلی

تقسیم توں پہلے نواب اف بہاولپور نے بہاولپور ہاوس نیو دہلی 1 سکندر روڈ تے تعمیر کروایا ہئی ۔ دہلی دے دورے دے دوران نواب صاحب اس عظیم الشان عمارت وچ قیام کریندے ۔ ریاست دے ملازمین اس دی ݙیکھ بھال تے تعینات ہن ۔ تقسیم ہند دے بعد وزارت ثقافت نے اس عظیم الشان عمارت دی ݙیکھ بھال اپݨے ذمے گھدی۔

1969ء توں فروری 1974ء تک اس وچ امریکن لائیبریری عارضی طور تے کم کریندی رہی ۔ بعدازاں اس عمارت دی عظمت و شان دے پیش نظر وزارت ثقافت نے نیشنل سکول آف ڈرامہ دا ہیڈ کوارٹر بݨا ݙتا ۔ اس وچ فن و ادب و ثقافت دا مرکز وی قائم ہے۔ اس عمارت کوں مزید وسیع وی کیتا گیا ہے ۔

2011ء وچ دہلی میٹرو ریلوے کارپوریشن نے زیر زمین ریلوے لائن کوں وسعت ݙیوݨ دا پراجیکٹ بݨایا ۔ ہک زیر زمین ریلوے ٹریک بہاول پور ہاوس دے تلوں گزرنا ہئی لیکن عوام تے پریس نے شور مچا ݙتا کہ اس ریلوے منصوبے نال اس عظیم الشان عمارت کوں نقصان دا اندیشہ ہے ۔ بہاولپور ہاوس نیو دہلی میونسپل کونسل دے ریکارڈ وچ "قومی ورثہ" دے طور تے وی درج ہے ۔

اس عظیم قومی ورثے کوں محفوظ رکھݨ کیتے لیے کمیشن بݨایا گیا ۔ اس ضمن وچ دہلی میٹرو ریل کارپوریشن دے ڈائریکٹر سری دھرن تے یونین اربن ڈویلپمنٹ دے وزیر کمال ناتھ دی اس مسئلے تے ملاقات تھئی ۔ دہلی میٹرو ریل کارپوریشن نے زیر زمین ریلوے لائن دے نقشے کوں تبدیل کرݨ دی یقین دہانی کرائی ۔ وزارت ثقافت نے وی سخت نوٹس گھدا تے اس عظیم الشان عمارت کوں محفوظ رکھݨ کوں یقینی بݨایا ۔