ڈائری دا پنا 9
ڈائری دا پنا : 9, डाईरी दा पन्ना ९
میکوں میڈا شعر سبھ توں پہلے دیرہ غازی خان وچ محمد ذاکر سنڑوایا ہا ' انویہ سو اسی وچ ریلویے دی ملازمت دا زمانہ ہا تے ریلوے ریسٹ ہاؤس وچ رہندا ہَم ' کیف انصاری تے سلیم فراز سویں مہاندرے شاعریں نال یاری تھی گئی ' سلیم فراز دی ٹین بازار وچ دکان ہئی ' سلیم فراز تے اوندے ڈو بھرا صابر شہزاد تے ذاکر اوندے نال کم کریندے ہَن ' ایہ سارے بھرا کمال دے شاعر تے سخن فہم ہَن ' دکان اگوں لکڑ دیاں چوکیاں وِچھیاں ہویاں, چا دے ادھے چلدے ہوئے, غالب دے ہک ہک شعر اتے گالھ مہاڑ جاری ' سلیم فراز غالب دا کوئی شعر پڑھدا, ہتھوڑی دی ٹین اُتے ضرب رُک ویندی, کہیں ازل ابد دے درمیانی وقفے وچ غالب دی تفہیم دا در کُھلدا ' صابر شہزاد گالھ دیاں ست پرتاں کھول کے رکھ ڈیندا 'اوہ صابر شہزاد جیں آکھے : مجھ سے بدن میں آگ لگائی نہ جا سکی میں جگنوؤں کے ساتھ گزارا نہ کر سکا... صابر شہزاد صرف ہک گھنٹہ بھرا دے نال رل تے کم کرے ہا ' اپنڑی سگرٹ دی ڈبی تے چاہ دے پیسے سلیم فراز توں گھنے ہا, میکوں اشارہ کرے ہا " آؤو بھئی چائے پیتے " ول غالب دی شاعری دا جہان کھُل ونجے ہا ' غالب دی محبت میں انہاں بھراویں توں پاتی ' اتھاہوں غالب دی شاعری کوں سمجھنڑ دی اٹکل لدھی ' میں ملتان دا روایتی پردیسی ہم' میڈی ساری ڈیکھ بھال انہاں بھراواں اپنڑے ذمے گھن گھدی ' سلیم فراز دکان بند کریندا تے رات دا کھانڑا اساں گھر رل کھاندے ' ہنڑ انہاں شاعراں دا چھوٹا تے بنکار بھرا شوکت ندیم وی رل آندا تے ول شاعری دی دنیا آباد تھی ویندی ' سلیم فراز نال چاہ دیرے دے لاری اڈے تے جیڑھا اوں ویلے جی ٹی ایس اسٹینڈ سڈویندا ہا پیندے ' اپنی غزل: کینویں ساکوں یاد نہ رہسی اوندے گھر دا رستہ سلیم فراز دے گھر باہروں بیٹھیاں میں شروع کیتی تے پہلا شعر اونکوں سنڑوایا ' اج یاد آئے میکوں میڈا شعر سبھ توں پہلے ذاکر سنڑوایا ہا ' دکان تے چا دا ادھا پیندیاں میں ہک غزل سنڑوائی جیندا مقطع ہا : رفعت جیکر ایہا ٹور ...... جنگل دے وچ پوسی رات میں گھر ملتان لگا آیا ڈو ترے ڈینہ پِچھوں دیرے گیم تےمحمد ذاکر میکوں ایہ شعر سنڑوایا ' ایہ میڈا پہلا شعر ہا جیڑھا میں کہیں بئے دے مونہوں سنڑیا۔
رفعت عباس، रिफ़ात अब्बास