وسیب دے توہمات تے طارق دے ݙوہڑے

سرائیکی وسیب تے "توہمات" دی وکڑ ٻہوں ڈھیر ہِے۔  پر، سچّے تے سُچّے پِیر مُرشد دا احترام ہر بندہ کرین٘دے۔ سرائیکی وسیب دی زمین کُوں اے شرف حاصل ہِے۔ جو اِیں حضرت بابا فرید شکر گنج، بہاء الدین زکریا ملتانی، حضرت سلطان باہو تے ٻہوں سارے ٻیاں اولیاء دے پیر چُمَّݨ، اِنّھاں ہستیاں نے سرائیکی وسیب نال اِتنا پیار کِیتے جو اے لوک وسیب دے لوکیں دے اعتقاد دا حِصّہ بݨ ڳئین۔ ڄیکر دریا اِچ ٻیڑی گُھمَّݨ گھیر اِچ آ ون٘ڄے تاں اَڄ وی موہاݨے،"دَم دَم حق، غوث بہاول حق" دے نعرے لین٘دِن۔ وسیب دے لوک مشکل اِچ پِیر فرید کُوں سُرین٘دِن تے کوئی تَوِیت لکھواوݨ پُڄ وین٘دے ہِن۔ سئیں احمد خان طارق ہوراں اِیں حوالے نال سرائیکی لوک ادب وِچ ݙوہڑے اِچ جیڑھا کَم کِیتا اُوہ اپݨی مثال آپ ہِے۔ نمونے طور تے سئیں دا ہِک ݙوہڑا ݙیکھو:

میݙا پِیر فرید کئی پُھل لکھ ݙے، ݙین٘ہ لہݨ تُوں پہلے وَل آوے

میں اَکّھیں نُوٹ کے ٻاہن٘دی ہاں، میݙے ٻہݨ تُوں پہلے وَل آوے

ݙر لڳدے بھاݨے بِھک تے ہِن، بِھک ڈھݨ تُوں پہلے وَل آوے

متاں طارق ڄٹیاں ݙیکھ گِھنّن، ہن٘ڄ وہݨ تُوں پہلے وَل آوے

عشق اپݨے سارے معاملات سُودھا، سرائیکی لوک ݙوہڑے اِچ ظہور کرین٘دے۔ دِیدارِ محبوب کِیتے شاعر دی بے تابی، اتنی شدید ہِے جو اُو ہِک لمحہ وی انتظار نئیں کر سڳدا۔ "میݙے ٻہݨ تُوں پہلے وَل آوے"۔ دے الفاظ اِتّی بے تابی دا اظہار کرین٘دِن جو اِیں بے تابی کُوں اِنّھاں تُوں بہتر الفاظ اِچ بیان وی نئیں کِیتا ون٘ڄ سڳدا۔

احمد خان طارق دے ݙوہڑے اِچ اساکوں سرائیکی لوک دانش تے سرائیکی اساطیر دے خزانے مِلدِن۔ اُنّھاں دا اساطیری مطالعہ ٻہوں گہرا ہِے اُنّھاں دا کمال اے ہِے جو اِنّھاں نے اساطیر کُوں برموقع تے بر محل پیش کرݨ دا ہُنر ڄاݨدِن۔ اُوہ سرائیکی وسیب دیاں ثقافتی قدراں تے توہمات تُوں پوری طرح با خبر ہِن۔ ہِک ݙو مصرعے ملاحظہ کرو:

میں جئیں ویلھے اوندا ناں چاتے            

ہتّھوں تھاں ڈَھیہ پئے، شالا خیر ہووے

ہِک ٻیا نمونہ ݙیکھو:

دم آخری ہِن، نہ دڑکے ڈے

ہاں ماندے ول نہ ویل سٹیں

ٻیا ݙیکھو

• ݙوہڑا اَتے احمد خان طارق۔

• سرائیکی لوک ادب وِچ ݙوہڑا۔

• طارق دے ݙوہڑے دے لوک رِیت۔

ٻاہرے رابطے

• سئیں ابنِ کلیم احسن نظامی دی لائبریری ݙیکھو۔ ۔ ۔ ۔ ۔ ۔ ۔