واہ سیاست واہ جہالت

واہ سیاست، واہ جہالت،

پنج سال حالت ء ماتم ءچ گزار کے ایں امید تیں قائم رہ گئے ہیں جیرھے جگنو اج چمکدے پئین کل کوں رات دا سینہ چیر کے نویں رُت نویں بہار گھن کے آسن، پَر اساں اینجھے مداری دے ہتھ ءچ ہئیں جڈاں ساڈی نندر اکھڑدی ھے اُو ساڈیاں اکھیں مُندر کے ساکوں ولا سَما ڈیندے، کڈھائیں قوم دی لُوری کڈھائیں پیری مریدی دے ساز کڈھائیں وصبے وسیب دا دُول وجا کے ساڈیاں اکھیں مُندریندے، اساں ہر پُرانڑے گلوکار کنیں نویں غزل سُنڑ کے تاڑیاں مریندے ہیں، ساکوں اجاں تئیں رھبر تیں رھزن دا فرق معلوم نیں تھی سگیا.

اساں اُو باشعور لوک ھئیں جیرھی کُکِڑ پرائے گھر انڈہ لہیندی ھے اوکوں کجھ ڈینھ بعد زبح کر کے کھا چھوڑیندے ھئیں کہ دانڑے اساں گھتوں انڈے ہمسائے کھاون، آپڑاں نکا جھئیاں نقصان برداشت نیں تھیندا لیکن ووٹ ڈیونڑ ویلھے ساڈے شعور کوں ساڈے ضمیر کوں غلامی دا پڑھایا ھویا سبق یاد آویندے پچھیں اساں ہر اوں امیدوار کوں سپورٹ کریندے ھئیں جئیں میڈے وصبے وسیب کوں سوائے پستی دے کجھ نئیں ڈتا، میڈے جٹاکے سوال ہن تساں پڑھیے لکھیے باشعور طبقے کنیں جنھیں پیریں سرداریں کوں ستر سال کنیں ووٹ ڈیندے آئے ھاؤ انھیں دے کم از کم صرف 5 ایھو جھئیں کم ڈسو جنھیں کوں ڈیکھ کے دل مطمئن تھیندا ھووے ضمیر دے اگوں سُرخرو تھیندے ھووں، ستر سال ءچ اگر پنج کم ایھو جھئیں کائینی پچھیں آپڑاں بلڈ ٹیسٹ کراؤ کتھائیں ساڈے خون ءچ حیوانیت تاں نئیں رل گئ، اگر اساں اشرف المخلوقات دا دعوہ کریندے ھئیں پچھیں اے سُوچنڑ دی گال ھے کہ کیوں ساڈیاں وستیاں اُجڑدیاں ویندن کیوں اساں محروم لوکیں ءچ شمار تھیندے ھئیں کیوں ساکوں ویچا ویندے کیوں ذلت ساڈا مقدر بنڑ گئ ھے ،اساں ہر دفعہ ہکے بندے دا پُوچھڑ کیوں پکڑی پئے ھئیں ساڈی مجبوری کیا ھے، کافی سارے لوک ہن جیرھے ساکوں اندھارے توں کڈھ کے سوجلھے دو نیونڑ چاھدن پَر ساڈیں اکھیں تیں موتیا آ گئے ساکوں سجھ دو ڈیکھنڑ لُو ہٹکیا گئے.