نصیر سرمد سائروی

اصل ناں    نصیرالدین

تخلص       سرمدؔ

جٖمنْ        1946ء

جاہ پتہ      دین پور روڈ ۔ڈیرہ اسماعیل خان

نصیر سرمد ؔسرائیکی شاعری دا ہک معتبر حوالہ ہن۔انہاں دی شاعری پڑھن ْتے سنْنْ والیں کوں متاثر کریندی ہے کیوں جو آپ دی شاعری وچ درد ،وچھوڑا ،مونجھ مونجھاری تے سوز و گداز پاتا ویندے ۔اوہ ہک با شعور تے سجٖاک شاعر ہے تے غزل دے مزاج کوں سمجھدے تے غزل کوں غزل دے معنے ڈٖے کے لکھدے۔

سرائیکی شاعر نصیر سرمد سائروی 3 مارچ 1946 کوں دیرہ اسمعیل خان اچ پیدا تھئے - نصیر سرمد بہوں سوہنڑا تے من بھاونڑا شخص ہئ - محکمہ تعلیم اچ معلم اتے سرائیکی شاعری دے حوالے نال ہک منا منایا ناں -جیندی شاعری دے قدردان اج وی سرائیکی وسیب اچ موجود ہن - نصیر سرمد روایتی شاعری کول ہٹ کے دامان دی تس اتے اتھوں دے لوکاں دیاں محرومیاں کوں آپنڑی شاعری دا مرکز بنڑایا- انھاں دی ساری حیاتی انھاں محرومیاں کوں بیان کریندے گزری ہے

اج یعنی 11 مارچ کوں انھاں دی ڈوجھی برسی ہے - نصیر سرمد کوں اللہ سونہڑاں جنت ءچ جھاہ ڈیوے آمین

میڈا بستہ اُوپرا بستہ گندہ مندہ کوہترہ بستہ نہ بستے وچ میڈا حصہ نہ سبقاں وچ میڈا قصہ آپ کوں چھوڑ کے غیر کوں پڑھداں دریا تھی کے نہر کوں پڑھداں

غزل

اکھیاں دیوچ ہنج دا تارا نچدے ساری رات

دل ہے یا سینے وچ پارا نچدے ساری رات

جگنوں ہے یا کوئی عاشق ہک پل اکھ نئیں لیندا

اسماناں تے ہک انگارا نچدے ساری رات

توں چوڈٖی دا چن تھی کے جو پیر اسمان تے پییندیں

تیکوں ڈٖیکھ سمندر سارا نچدے ساری رات

جیڑھے ڈٖینہ دا چن ٹریا ہے چھوڑ کے میڈٖی وستی

وستی دے چَو گٖوٹھ اندھارا نچدے ساری رات

تیڈٖے نال جہان دیاں خوشیاں جھمراں آن مریندن

سرمدؔ کملا آپ مہارا نچدے ساری رات

؎خنجراں کوں تیز شمشیراں کوں ڈٖہدا رہ گٖیاں

او میڈٖے دل کوں تے میں تیراں کوں ڈٖہدا رہ گٖیاں

دل کتھائیں قیدی تاں نئیں تھیندا اوں کالی زلف دا

خواب دیوچ رات زنجیراں کوں ڈٖہدا رہ گٖیاں