منیر حسین (ڳائیک)

وکیپیڈیا توں


منیر حسین (اردو: منظور حسین (گلوکار)) (انگریزی: Munir Hussain) دی سُن٘ڄاݨ پِچھوکڑ اَواز لوک ڳائیک دے طور تے ١٩٥٧ء وِچ فلم سات لاکھ دے ہِک میگا ہِٹ ڳاݨے نال تھئی ہئی۔ اِیں دور وِچ مہدی حسن نے وَدھ ڳائیک دے طور تے منیر حسین دے نال کُجھ گِیتاں وِچ سنڳّت وی کِیتی ہئی۔ منیر حسین نے اپݨی ٣٨ ورھیاں دی کَم کار آلی حیاتی وِچ اَتے لَمّے فلمی کَم کار دی حیاتی وِچ ١٦٣ فلماں کِیتے ٢١٧ گِیت ڳائے جِنّھاں وِچ "سات لاکھ"، "عشق لیلٰی"، "نوراں"، "ہیر"، "مکھڑا"، "نیا زمانہ"، "بودی شاہ"، "عالم آراء"، "بچہ جمورا"، "ناجی"، "جھومر"، "ساتھی"، "شمع"، "سوہݨی کمہارن"، "سچّے موتی"، "گلفام"، "گلبدن"، "سلمیٰ"، "آنچل"، "شہید"، "اولاد"، "دامن"، "چوڑیاں"، "آشیانہ" جئیں دُھم پاوݨ آلے فِلماں وی شامل ہِن۔ اِنّھاں فِلماں وِچ ڳائے ڳئے اِنّھاں دے کُجھ گِیتاں نے ٻہوں وَدھ دُھم پاتی اَتے سدا بہار ہِن۔ اُوہ پاکستان دے پہلے ڳائیک ہَن جِنّھاں کوں ہِکّے ویلے اردو اَتے پنجابی فلماں وِچ کامیابی مِلّی ہئی۔

ہِک موسیقار ٹَٻَّر نال تعلق رکھݨ آلے منیر حسین دے سڳّے ماماں رشید عطرے پاکستان دے ٻہوں وݙّے موسیقار ہَن۔ جاں جو اِنّھاں دے مَسیر صفدر حسین وی ہِک چنڳے پائے دے موسیقار ثابت تھئے ہَن۔ اِین٘ویں پاکستان وِچ سبھ تُوں وَدھ فِلماں وِچ موسیقی ݙیوݨ آلے موسیقار وجاہت عطرے اِنّھاں دے ملیر ہَن۔ منیر حسین کوں اپݨی پہلی ای نغماتی فلم "سات لاکھ" دے دُھم پاوݨ آلے گِیت "قرار لوٹنے والے، تو پیار کو ترسے" دی ریکارڈنگ کِیتے اِنّھاں دے ماماں رشید عطرے نے وݙّی تیاری کرائی ہئی اَتے اِنّھاں دا اَغاز ای وݙّا دھماکے دار ثابت تِھیا ہئی۔


سبھ تُوں وݙّی زیادتی اِیہ ہئی جو فلم "ثریا بھوپالی" وِچ ہِک قوالی ہئی جیڑھی مہدی حسن، ناہید اختر اَتے سنڳتیاں دی اَوازاں وِچ ہئی جاں جو اِین٘دا انترا اَتے ٻئے تاناں لاوݨ کِیتے موسیقار اے حمید کُوں منیر حسین دی خدمتاں گِھنݨیاں پئے ڳیاں کیوں جو اُچّی تان لاوݨ مہدی حسن دے وَس دی ڳالھ کائے ناں ہئی اَتے ناں ای اُوہ غزل تُوں انج ٻئے وَنکیاں دی ڳائیکی کِیتے موزوں ڳائیک ہَن۔ جاں جو اُوں ویلے اُوہ مہان٘در دے سَوا نیزے تے ہَن اَتے ہر فلمساز دی آس ہون٘دی ہئی جو اردو فلماں وِچ مہدی حسن دی مہان٘در کُوں جَھپیا ون٘ڄے۔

منیر حسین لوک ڳائیک ٢٧ ستمبر ١٩٩٥ء وِچ کوں فوت تِھی ڳیا۔