منظور علی خان (ڳائیک)

اُستاد منظور علی خان (اردو: منظور علی خان (گلوکار)) (انگریزی: Ustad Manzoor Ali Khan) (ڄَمَّݨ دی تَرِیخ: ١٩٣٠ء – فوت تِھیوݨ دی تَرِیخ: ٨ ستمبر، ١٩٨٠ء) پاکستان نال تعلّق رکّھݨ آلے مہان٘درے کلاسیکی موسیقار اَتے لوک ڳائیک ہَن۔

حیاتی دا احوال

اُستاد منظور علی خان ١٩٣٠ء کُوں ضلع شکار پور، برطانوی ہند (موجودہ پاکستان) وِچ ڄَمّے ہَن۔ اِنّھاں دا تعلّق موسیقی دے گوالیار ٹَٻَّر نال ہئی۔ اُستاد منظور علی خان دے پَر ݙاݙا اُستاد شادی خان ١٨٣٠ء وِچ والیٔ ریاست خیر پور وِچ مراد علی خان تالپور دے سَݙَّے تے ریاست خیر پور وِچ اَباد تھئے۔ اُستاد شادی خان دے پوترے جمالے خان ہَن جِنّھاں نے موسیقی دی سِکھلائی اپݨے پِیؤ اُستاد کریم بخش خان تُوں گِھدّی ہئی اَتے اپݨے چاچا اُستاد گامن خان دی سنڳّت وِچ ڳان٘دے ہَن۔ اُستاد جمالے خان دے پُتر اُستاد منظور علی خان ہَن۔ اِیہ ٹَٻَّر دھرپد ڳاوݨ وِچ مہان٘در رکھین٘دا ہئی۔

اُستاد منظور علی خان نے کلاسیکی موسیقی / لوک موسیقی دی سِکھلائی اپݨے پِیؤ اُستاد جمالے خان، اُستاد ہدی خان اَتے اُستاد سیندو خان تُوں گِھدی۔ اُوہ دھرپد دے نال نال خیال، ٹُھمری، دادرا اَتے ٹَپّہ ڳاوݨ وِچ وی مہان٘در رکھین٘دے ہَن۔ اِنّھاں کوں سندھ دی مقامی موسیقی دا علم ہئی۔ آکھیا وین٘دا ہِے جو سندھی راڳݨیاں جِتّی چنڳے انداز وِچ اِنّھاں نے ڳائیاں ہِن اِتّی اِیندے تُوں پہلاں کہِیں نے وی نئیں ڳائیاں۔ اِنّھاں نے کلاسیکی موسیقی اَتے سندھی لوک موسیقی دے ݙو دریاؤاں کُوں رَلا تے ہِک نواں انداز ݙِتّا ہئی۔

شگِرد

اُستاد منظور علی خان دے شَگِرداں وِچ اُستاد محمد یوسف (ڳائیک)، فتح علی خان، عابدہ پروین، رجب علی، وحید علی، قمر سومرو، گلزار علی، عبد اللطیف مہر اَتے وزیر سندھی دے ناں مہان٘درے ہِن۔

اعزازات

حکومتِ پاکستان نے اِنّھاں دی خدمتاں دے اعتراف دے طور تے اِنّھاں کُوں ١٤ اگست، ١٩٧٨ء کُوں صدارتی تمغائے حسنِ کارکردگی ݙِتّا ہئی۔

وفات

اُستاد منظور علی خان ٨ ستمبر، ١٩٨٠ء ٹنڈو آدم، پاکستان وِچ فوت تِھی ڳئے۔