ملتان، لوک تہذیب تے روحانیّت دا مرکز

تاریخی اعتبار نال ملتان ہِک ذات دا نی ہِک کائنات دا ناں ہِے۔ ماہرینِ آثارِ قدیمہ نے اِیں ڳالھ تے اتفاق کِیتے جو ملتان کائنات دے اِنّھاں شہراں وِچُوں ہِک ہِے جیڑھے ہزاراں سال تُوں مسلسل آباد چلے آن٘دِن، ماہرین دا اِین ڳالھ تے وی کامل اتّفاق ہِے جو تاریخِ عالم وِچ ملتان صرف ہِک شہر دے طور تے نی بلکہ ہِک لوک تہذیب تے ہِک سلطنت دے طور تے کرۂ ارض تے موجود رہ ڳے۔ ٣٧٣ ہجری دی ہِک تصنیف "حدود العالم بن المشرق الی المغرب" اِچ سلطنت ملتان دے بارے لکھیا ڳے جو ملتان دیاں سرحداں جالندھر تے ختم تِھین٘دِن، ہِک ٻئی کتاب "سید المتاخرین" اِچ لکھیے جو اے خِطّہ ٻہوں زیادہ زرخیز ہووِن دے نال نال وسیع و عریض وی ہِے، ہِک پاسے ٹھٹھہ، ݙُوجھے پاسے فیروز پور، جیسلمیر، تے کیچ مکران تک دے علاقے اِین٘دے اِچ شامل ہَن۔ ابوالفضل دی مشہور کتاب "آئینِ اکبری" اِچ درج ہِے جو ملتان ٻہوں وݙّی اقلیم ہِے اِین٘دے وِچ ترائے سرکاراں ملتان خاص، دیپالپور تے بھکر شامل ہَن۔ ملتان دی لوک تہذیب تے لوک ثقافت ٻہوں مضبوط ہِے، اے علاقہ ٻہوں وݙّا تجارتی تے ثقافتی مرکز ہِے، انقلاباتِ زمانہ تے ہزاراں سالاں توں حملہ آوراں دی ریشہ دوانیاں دے باوجود اِیں خطّے اپݨی منفرد تہذیبی شناخت کُوں قائم تے زندّہ رکھیا ہویا ہِے۔ اے وی وقت تے حالات دی ستم ظریفی ہِے جو اَڄ ملتان کُوں جنوبی پنجاب بݨاوݨ دے دلاسے ݙتّے وین٘دے پئن، کل ملتان کیا ہا؟ تے لہور دی کیا حیثیّت ہئی؟ اِین٘دا تذکرہ حضرت داتا گنج بخش علی ہجویریؒ دی کتاب "کشف المحجوب" یکّے از لاہور مضافاتِ ملتان دی صورت اِچ موجود ہِے۔ اڄ اساں لَہور تے ملتان دے بارے اتنا عرض کریسوں جو

کیسے کیسے لوگ ایسے ویسے ہو گئے

ایسے ویسے لوگ کیسے کیسے ہو گئے

ٻیا ݙیکھو

• ٧٥٢ ہجری دے سرائیکی لوک اشعار۔
• سرائیکی لوک ادب وِچ نور نامہ دی اہمیّت۔
• اُردو دی ماء۔
• سرائیکی زبان دا قدیم ادب۔
• ملتان دی لوک تہذیب۔

ٻاہرے رابطے

• جھوک پبلشرز دے کتاباں۔
• سئیں ظہور دھریجہ دا تعارف اُردو زبان وِچ۔ ۔ ۔ ۔ ۔ ۔ ۔ ۔ ۔ ۔