معشوق سلطان

معشوق سلطان یا سلطانہ بی بی (اردو: معشوق سلطان) (انگریزی: Mashooq Sultan) (ڄَمَّݨ دی تَرِیخ: ١٩٥٢ء – فوت تِھیوݨ دی تَرِیخ: ١٩ دسمبر ٢٠١٦ء) پاکستانی لوک ڳائیکہ اَتے سابقہ اداکارہ ہَن۔ پاکستان دا وݙّا قومی ادبی ایوارڈ تمغائے حسنِ کارکردگی نال اِنّھاں کُوں نوازیا ڳیا ہِے۔ معشوق سلطان کُوں امریکہ، برطانیہ، فرانس، بیلجئیم، متحدہ عرب امارات اَتے افغانستان جئیں اَݨ ڳِݨت مُلخاں وِچ پاکستان دی نمائندگی اَتے پشتو موسیقی وِچ اِنّھاں دی خدمتاں کِیتے اِنّھاں کُوں بعض ویلے "پشتو لوک موسیقی دی میلوڈی کوئین" اَتے "سٹیج دی ملکہ" آکھیا وین٘دا ہِے۔ معشوق سلطان ہِک لوک ڳائیکہ دی حیثیّت نال اِنّھاں نے انجو انج علاقائی ٻولیاں جیویں: اردو، پنجابی، سرائیکی اَتے بݨیادی طور تے پشتو و،چ ١٥٠٠ البماں وِچ کَم کِیتا۔ معشوق سلطان نے غزلاں کُوں ڳایا اَتے پشتو فِلماں وِچ پِچھوکڑ اَواز ڳائیکہ دی حیثیّت نال وی کَم کِیتا۔

کَم کار

جِہڑیلے معشوق تقریباً سولھاں ورھیاں دے نیڑے ہئی اوہ شادی دی سَوَبّاں تے نغمے ڳان٘دی ہئی اَتے ١٩٦٢ء وِچ ڳائیکی دے پیشے نال کَم کار دا اَغاز کِیتا جِہڑیلے ہِک پاکستانی ریڈیو پروڈیوسر، نواب علی خان یوسف زئی نے معشوق دی قومی عوامی براڈ کاسٹر نال سُن٘ڄاݨ کرائی۔ ریڈیو تُوں اَنج اُوہ پاکستان ٹیلی ویژن کارپوریشن نال وی ڄُڑی رہی ہئی۔ ڳاݨے تُوں پہلاں اِنّھاں نے جوارگر، جانان جئیں پشتو فلماں وِچ کَم کِیتا جاں جو بعد وِچ ڳاوݨ کُوں چُݨیا۔

ذاتی احوال

معشوق سلطان خیبر پختونخوا وِچ ضلع سوات دے شہر مٹّہ وِچ ڄَمّی ہئی۔ جِہڑیلے اُوہ ٻالڑی ہئی تاں اِنّھاں دا ٹَٻَّر شاہ دہرائی تُوں مردان آ ڳیا۔ معشوق سلطان دی شادی ولایت حسین نال ٻارہ ورھیاں دی عمر وِچ تھئی۔ معشوق سلطان اَتے ولایت حسین دے ݙو دِھیاں اَتے چار پُتر ہِن۔

ایوارڈز اَتے پِچھاݨ

معشوق سلطان نے سَٹھ تمغے جِتّے۔ ١٩٩٦ء وِچ، پشتو موسیقی وِچ اِنّھاں کردار دے اعتراف وِچ اِنّھاں کُوں صدارتی تمغائے حسنِ کارکردگی وی ݙِتّا ڳیا۔

وفات

معشوق سلطان صحت دی اوکھاں وِچ پئی رہی اَتے ١٩ دسمبر ٢٠١٦ء کُوں جگر اَتے شوگر دے بِماریاں دی پارُوں پشاور وِچ فوت تِھی ڳئی۔