مشتاق احمد فریدی

میں تاں کوئی خیال ہاں ــــ لبھساں نال خیال دے

سائیں سچل سرمست

لکھت کرن لاشاری،

صدر سرائیکی عوامی تریمت تحریک پاکستان

مشتاق دے لفظی معنی ھوندن کہیں شعبے دا ماہر یا مکمل دسترس رکھݨ والا،

ایویں ہی سرائیکی عوامی سنگت دے صدر تے اساݙی سرائیکی زبان دے مشتاق ادا مشتاق احمد فریدی سئیں ھن جو سرائیکی زبان دی تاریخ، سیاست، تے ادب تے مکمل دسترس رکھیندن بلکہ سرائیکی زبان دے ماہر ھن، اساں جے نووارد سرائیکی کاز دے طلبہ تے کارکنیں سانگے ھک مکمل انسائیکلو پیڈیا دی حیثیت رکھیندن، میکوں بطور صدر سرائیکی عوامی تریمت تحریک دے اکثر سرائیکی زبان دے ادب، تاریخ یا ݙوجھے سرائیکی تحریری معاملات سانگے ڄݙݨ وی کئی اوکھ پئی تاں ہمیش مستند تے آخری آپشن ادا مشتاق احمد فریدی سئیں نظریے، تے سئیں ادا مشتاق احمد فریدی ہمیشہ ھک شفیق بزرگ تے استاد وانگو پُکریے اور اساݙے علم وچ ودھارا کیتا،،،

ادا مشتاق احمد فریدی سئیں بزات خود ھک سرائیکی زبان دے پنجاہ (50)سال کنے ماضی تے حال ھن،،

میݙی معلومات دے مطابق ادا مشتاق احمد فریدی سئیں 1947 دے وچ فریدآباد تحصیل خانپور ضلع رحیمیار خاں وچ پیدا تھیے تے ابتدائی تعلیم خانپور تے بہاولپور وچ حاصل کیتی جناب زمانہ طالب علمی تو ہی اپݨی ماء ٻولی سرائیکی زبان دے کاز نال دلچسبی رکھیندے ھن، تے میٹرک دے دوران ہی سینگے سنگتیاں نال رل تے بزم فرید تحریک ناں دی ادبی تنظیم تشکیل کیتی تے کئی عرصہ ایں پلیٹ فارم تو سرائیکی ادب دی خدمت کیتی ،،

ولا کہیں زاتی کم دے سانگے کراچی آے تے خود وی کراچی شھار دے تھی تے رہ گے،،،

پراپݨی ماء ٻولی سرائیکی کو سینے لاتی رہ ڳئے تے سن 1974دے وچ اپݨے وانگو سرائیکی ادب تے زبان دے ہم خیال دیوانے شیدائی ادا نزیر لغاری سئیں نال ملاپ تھی پیا تے کراچی دے وچ جسٹس شفع محمدی صیب دی سرپرستی دے وچ سرائیکی کاز سانگے پاکستان سرائیکی سنگت دے ناں نال ھک تنظیم بݨائی ڳئی جیندے سینئر نائب صدر ادا مشتاق احمد فریدی سئیں منتخب تھئے،،

انھاں دی سرائیکی زبان دی نمایاں خدمات وچ اہم اے ھے جو ادا مشتاق احمد فریدی انھاں عظیم لوکاں وچ شامل ھن جنھاں سرائیکی زبان دے اضافی حروف تہجی تے ابتدائی قاعدے دی تشکیل کیتی،،

ادا مشتاق احمد فریدی سئیں نے وسیب سمیت کراچی دے وچ وی سرائیکی کاز کو نمایاں کیتا تے سرائیکی کاز دے نویں کارکنیں دی حوصلہ افزائی کیتی، اپݨے ساویں ݙوجھے سنگتیاں نال مل تے زاتی اخراجات رلا کراہیں ڈھڳ سارے سرائیکی پروگرام تے سیمنار کراے، تے ایں ویلے وی جناب بطور صدر سرائیکی عوامی سنگت، سرائیکی زبان تے ادب دی خدمات وچ نشابر کردار ادا کریندے پن،،

میں سمنجھدی ھاں جو ادا مشتاق احمد فریدی سئیں جہے لوک ہی اساݙے اصل ہیرو ھن جنھاں سرائیکی زبان تے حقوق دی سانبھ سانگے اپݨی پوری حیاتی لا ݙتی ہنس،،

اللہ پاک ادا مشتاق احمد فریدی سئیں دا سایہ اساݙے اتے سرائیکی عوامی سنگت تے سرائیکی عوامی تریمت تحریک تے تادیر سلامت رکھے اور جناب ایویں ہمیش اساݙی رہنمائی تے سرائیکی زبان دی خدمت جاری رکھن