ماریہ الفا

ماریہ الفا (اردو: ماریہ الفا) (ڄَمَّݨ دی تَرِیخ: ٢١ دسمبر ١٩٥٥ء)۔ اُوہ ہِک انڈونیشیا دی قاریہ (تلاوتِ قُرآن کرݨ آلی) اَتے سنٹرل انسٹی ٹیوٹ برائے قرآنی تلاوت دی ترقی دی منیجر ہِن۔ اُوہ انڈونیشیا دے قومی قرآن خوانی قرآنی مقابلیاں دی فاتح ہِن اَتے اُنّھاں کُوں عالمی سطح اُتے دُنیا دے مہان٘درے اَتے اُستاد قرأت کرݨ آلیاں اَتے تلاوت دے اساتذہ دی حیثیّت نال پِچھاݨا وین٘دا ہِے۔ اُوہ انسٹی ٹیوٹ برائے مطالعہ قرآن اَتے انڈونیشیا وِچ نیشنل اسلامک یونیورسٹی وِچ لیکچرار، ہووݨ دے نال نال ١٩٨٠ء وِچ ملائشیاء وِچ بین الاقوامی قرآن خوانی ایوارڈ جِتَّݨ آلی پہلی زنانی ہَن۔ اُوہ اِیں پِڑ وِچ ہِک بین الاقوامی سطح اُتے اہم شخصیّت سمجھی وین٘دی ہَن۔ اَتے اُنّھاں کُوں جنوب مشرقی ایشیاء دی سبھ تُوں مہان٘دری قرآن مجید تلاوت کرݨ آلی قاریہ دے طور تے وی سُن٘ڄاݨا وین٘دا ہِے۔

ذاتی حیاتی

ماریہ الفا ٢١ دسمبر ١٩٥٥ء کُوں حاجی مدھوفر اَتے حججہ رومینہ دے گھر وِچ ڄَمّی ہَن۔ اُوہ اِنّھاں دی ٻارہاں وِچُوں، نان٘ویں اَل ہئی۔ ١٩٨١ء وِچ اُنّھاں نے انڈونیشیا یونیورسٹی دے میڈیکل سکول وِچ ہِک پلمونولوجسٹ اَتے تنفّس دے معالج اَتے لیکچرر مختار اقسان نال شادی کِیی۔ اِین٘دے ترے ٻال ہِن: احمد نبیریز، محمد لبیب اَتے رفکی مبارک۔

کَم کار دی حیاتی

ماریہ دی اِنّھاں دے اَبا سئیں حاجی مدھوفر نے تلاوتِ قرآن نال سُنڄاݨ کرائی ہئی۔ جِنّھاں نے اِنّھاں کُوں اِیہ سکھایا جو اُوہ کہِیں وی مرد یا زنانی دے برابر ہِن۔ اُنّھاں نے اپݨی دِھی کُوں تجربہ ݙیواوݨ کِیتے اُنّھاں دے ابائی شہر وِچ تلاوتِ قرآن مجید دا انعقاد کِیتا۔ اُنّھاں دی سِکھلائی اپݨی وݙّی بھیݨ دی ہدایت دے نال، ٦ ورھیاں دی عمر وِچ شروع تھئی۔ اِیں فن وِچ اُنّھاں دی دلچسپی اُوں ویلے وَدھدی ڳئی جِہڑیلے اُوہ اسلامی بورڈنگ سکول وِچ پڑھدی ہَن جِتّھوں تُوں اُنّھاں کوں تلاوت کرݨ دی ترغیب مِلّی۔ سن ١٩٨٠ء دے ݙہاکے تُوںِ ماریہ قرآنی قرأت وِچ بین الاقوامی سطح اُتے ہِک مہان٘دری اَتے معزّز شخصیّت ریہی ہِے۔ ماریہ انڈونیشی جزیرے وِچ قرآنی تلاوت دی تاریخ دے سکالر تُوں انج جکارتہ وِچ انسٹی ٹیوٹ فار قرآنی علوم جکارتہ وِچ لیکچرار وی ہِن۔ اُوہ ملائیشیا، مصر، آسٹریلیا، امریکہ، کینیڈا اَتے کئی یورپی ممالخ دا دورہ کر چُکّی ہِن۔

ٻاہرلے جوڑ

• ذاتی ویب سائٹآرکائیو شدہ