لوک قصّے دا سیفل خواں

مولوی لطف علی دے لوک قصّے سیف الملوک دا ا ندازہ اِیں ڳالھ تُوں لایا ون٘ڄ سڳدے جو لوک قصّہ سیفل ملوک سرائیکی وسیب دی ہر کچاری، وساخ تے کٹھ میل وِچ وݙی محبّت نال پڑھیا تے سُݨیا وین٘دا ہا، سیفل ملوک پڑھݨ والئیں کُوں مولود خواں دے وزن تے سیفل خواں آکھیا وین٘دا ہا، اساں 1992ء نیو دہلی دی پہلی عالمی سرائیکی کانفرنس تے ڳئے تاں ہِک ٻڈّھے ہندو "سیفل خواں]] وݙّی سِک نال لوک قصّہ سیف الملوک سُݨایا اَتے آکھیا جو اَدھ صدی گزرݨ دے باوجود وی میکُوں اِیہ لوک قصّہ سیف الملوک یاد ہے حالانکہ کتاب سیف الملوک میݙے کول کینھی، اِنّھاں ݙسیا جو میں خان پور کٹورے والا وِچ سیفل خواں مشہور ہَم اَتے رات کُوں سارے ہندو مسلم وݙّی محبّت نال لوک قصّہ سیف الملوک سُر نال سُݨدے ہَن۔ خانپور دے علاقے گڑھی اخیتار خان دے احسن فقیر، کھائی خیر شاہ دے رسول بخش الفت مہشور سیفل خواں ہِن۔ صوفی محمد یار بے رنگ اڄ وݙی محبّت نال سیفل پڑھدِن۔

میݙے اٻّا سئیں مولوی کریم بخش بہشتی تقریباً پنجاہ سال پہلے ٢٢ روپے دی بکری ویچ تے قصّہ سیف الملوک نقل کرایا اساݙی وستی دے لوکیں ݙاݙھے چبول بنائے اَتے آکھیا جو مولوی چریا تھی ڳے بکری ویچ تے کتاب نقل کرائی اے، اَتے ویہہ سارے روپے مولوی امان اللہ کُوں لکھائی بھری اے۔ میݙے ابّا سئیں وݙّی سِک تے چاہت نال قصّہ سیف الملوک پڑھدے ہَن۔

مولوی لطف علی سرائیکی زبان دے ٻہوں وݙّے شاعر ہَن اِنّھاں اَڄ تُوں ݙو سو سال پہلاں سرائیکی زبان وِچ لوک قصّہ سیف الملوک لِکھ تے سرائیکی زبان کُوں زندہ کر چھوڑیا۔ سیف الملوک اپݨے وقت دی شاہکار کتاب اے جِینکُوں پڑھ تے کئٰ لوک شاعر بݨ ڳئے۔ سیف الملوک دی مقبولیت دی حالت اے ہئی جو سرائیکی وسیب وِچ لوک یا قُرآن مجید دے حافظ ہَن یا وَل سیف الملوک دے۔

ٻیا ݙیکھو

• لوک قصّہ سیف الملوک دے شاعری تے اثرات۔
• سرائیکی لوک ادب وِچ نور نامہ دی اہمیّت۔
• ملتان دی لوک تہذیب۔
• سرائیکی زبان دا قدیم ادب۔
• لوک قصّہ سیفل نامے بارے روایتاں۔

ٻاہرے رابطے

• جھوک پبلشرز دے کتاباں۔
• سئیں ظہور دھریجہ دا تعارف اُردو زبان وِچ۔ ۔ ۔ ۔ ۔ ۔ ۔ ۔ ۔ ۔