لوک قصّہ سیف الملوک وِچ ثقافتی رنگ

لوک قصّہ سیف الملوک سرائیکی وسیب دی ہِک ثقافتی تخلیق ہِے۔ کتاب دے مصنّف مولوی لطف علی ہِک دیہات دے رہݨ والے ہن، اِنّھاں دے زمانے وِچ کُھوہ ہَن، جھلاریں ہَن، کٹھ ہن، میل ہن، صحبتاں تے سنگتاں ہن، اِیہا وجہ ہِے جو انّھاں دے کلام وِچ جاہ جاہ تے ثقافتی رنگ نظر اَمدِن، اِنّھاں ثقافتی رنگاں کُوں نشابر کرݨ دی ضرورت اے۔ مولوی لطف علی دے کلام تے تحقیق کرݨ دی لوڑ اے۔ اُون٘ویں تاں لوک قصّہ سیف الملوک ١٨٧٢ء وِچ لیتھو پریس لہور، ١٨٨٤ء وِچ وکٹوریہ پریس لہور، ١٨٨٨ء بعد وِچ محبتائی پریس لہور، نواں سکھر سندھ (سن نہ ملُوم) اَتے ١٩٦٠ء وِچ سندھی ادبی بورڈ حیدر آباد تُوں شائع تھیا۔ بعد وِچ لوک قصّہ سیف الملوک دا اُردو ترجمہ سئیں بشیر احمد نظامی ہوراں کِیتا اَتے اِین٘کُوں اردو اکیڈمی بہاولپور نے شائع کِیتا پر قصّہ سیف الملوک تے اُون٘ویں کَم نی تھی سڳیا جیویں تھیوݨ دا حق ہون٘دے۔ مبارک لائبریری محمد آباد تحصیل صادق آباد وِچ سیف الملوک دے ٻہوں سارے قلمی نسخے موجود ہِن اَتے سید انیس شاہ جیلانی سیف الملوک تے کَم کرین٘دے پئن، اسیڈی دُعا ہِے جو اُنّھاں دا کَم جلدی سامھݨے آوے تاں جو اساں جئیں ہزاراں طالبِ علمیں کُوں فیض حاصل کرݨ دا موقع مِلّے۔ (آمین)۔

لوک قصّہ سیف الملوک دے لِکّھت کار سئیں مولوی لطف علی دا مزار مبارک "مئو مبارک ضلع رحیم یار خان وِچ ہِے۔ پہلے سادہ قبر ہئی ١٩٨٢ء وِچ مخدوم سجاد حسین قریشی گورنر بݨیے تاں مہان٘درے سرائیکی لکھاری سئیں صدیق طاہر مرحوم دی اَرداس تے اُنّھاں ہِک لَکھ روپیہ مزار کِیتے منظور کِیتا۔ مزار بݨایا ڳیا پر ٹھیکیداریں دی بے ایمانی تے سرائیکی قوم دی بے حسی تے مزار دی ݙیکھ بھال نہ ہووݨ دی وجہ کنُوں اے مزار صدیاں پُراݨی لڳدی اے۔

ٻیا ݙیکھو

• لوک قصّہ سیف الملوک دے شاعری تے اثرات۔
• سرائیکی لوک ادب وِچ نور نامہ دی اہمیّت۔
• لوک قصّہ سیفل نامے بارے روایتاں۔
• سرائیکی زبان دا قدیم ادب۔
• آ چُݨوں رَل یار سرائیکی لوک گیت۔

ٻاہرے رابطے

• جھوک پبلشرز دے کتاباں۔

سئیں ظہور دھریجہ دا تعارف اُردو زبان وِچ۔ ۔ ۔ ۔ ۔