عبدالطیف ملنگ
اے من بھاوݨا سرائیکی لوک ڳاوݨ راڄن پور دے فوک گلوکار عبدالطیف ملنگ دی نویکلی سُنڄاݨ اے۔۔۔عبدالطیف ملنگ (بہشتی) یک تارے نال ایہو ڳاوݨ سُنڑیندے ہوئیں اکھ دی پپلی نال کڑکڑاں روپیہ چا گِھندا ہا, لوک اے منظر ݙیکھ کے ہربھرو تاڑیاں وڄیندے ہن۔
عبدالطیف ملنگ پکھی واس فقیر ہائی جیکر کئی پتہ پچھے تاں ݙسیندا ہائی۔۔۔۔ہا سئیں عاقل پور روڈ تے سردار امان اللہ خاں دریشک دی کوٹھی دے نالوں رہندا پیاں۔ دراصل سردار امان اللہ خاں دریشک دی درگھی کوٹھی دی کچھ وچ ہک خالی پلاٹ پیا ہوندا ہا, جتھ پکھی واس فقیریں دیاں ݙاہ ٻارھاں جھڳیاں ہوندیاں ہن ت عبدالطیف ملنگ اکثرا ڳݙاہ ریڑھی وہیندا عاقل پور روڈ تے مل ویندا ہائی۔ 1998 وچ میں آپڑیں بِھرا رانا انوار خالد دی شادی تے عبدالطیف ملنگ کوں وستی اُتیرا موضع سونواہ دعوت ݙتی, ݙاڈھی سوہنڑی محفل ٹھہائی ہاسی۔
عبدالطیف ملنگ اونویں تاں ننڈھی عمراہ کنوں یک تارا وڄیندا ت ڳاندا ہا, پر اونکوں لوک گلوکار ساݙے شہر فاضل پور دے ریڈیو پروڈیوسر منظور کامران ت ریڈیو ملتان دے سینئر پروڈیوسر خورشید ملک بنڑایا۔ 90 دے ݙہاکے وچ ریڈیو ملتان اݨ سکھندڑ گلوکاریں دا ہک مقابلہ کروایا ہا ت عبدالطیف ملنگ ایہو ڳاونڑ سُنڑا کے پہلا انعام چاتا۔
وۓ لوک خوش تھیندن سجݨ ساون دے منظر ݙیکھ کے
توں نہ روکیں وو میݙی پپلی دی جھالر ݙیکھ کے
ارمان دی ڳالھ ایہا اے جو ضلع راجن پور دے ادبی پردھانیں کݙاہیں وی عبدالطیف ملنگ کوں فنکار نہ منیا, شئیت ایں پاروں جو عبدالطیف ملنگ پکھی واس فقیر ہائی, ڳݙاہ ریڑھی وہیندا ہائی ت عاقل پور روڈ تے جھڳی وچ رہندا ہائی۔ وجہ جو وی ہووے پر عبدالطیف ملنگ کوں سرائیکی پروگراماں وچ نہ سݙیا ویندا ہائی۔۔۔۔پر, عبدالطیف ملنگ کوں لوک شادیں تے سݙیندے ہن ت خلقت اونکوں سُنڑدی ہائی۔ اوں دور وچ عبدالطیف ملنگ دیاں ݙو تراۓ کیسٹاں وی مارکیٹ وچ آیاں ہن۔
عبدالطیف ملنگ جیہڑا عاقل پور روڈ (راجن پور) وچ سردار امان اللہ خان دی ایکڑیں تے کِھنڈی کوٹھی دی کچھ وچ ہک جھڳی اندر رہندا ہائی جیندا پٹوار دی جمع بندی وچ کئی ناں تھاں کائنا ہائی۔۔۔۔اج ݙو ݙہاکے گزرݨ بعد سردار امان اللہ خاں دریشک دا ناں پنجاب اسمبلی دے فائلیں وچ گم تھی ڳئے جنہاں کوں کڈوکڑیں سِیوی کھا ڳئی اے۔ پر, عبدالطیف ملنگ دے ڳاوݨ جے تئیں دنیا رہسی سُنڑِیندے رہ ویسن۔ کݙاہیں عبدالطیف ملنگ کہیں ڄال دے پچھوں ت کݙاہیں کہیں بدلی دے وچو سر کڈھ کے ڳاندا کھڑا ہوسی!!
وۓ لوک خوش تھیندن سجݨ ساون دے منظر ݙیکھ کے
توں نہ روکیں وو میݙی پپلی دی جھالر ݙیکھ کے
لکھت: راݨا ابرار خالد