صباحت عروج

صباحت عروج دا تعلق خطہ سرائیکستان دے ضلع ڈیرہ غازی خان دے نال اے تے انہاں دی پیدائش 8 ستمبر 1995ء دی اے۔ اے اردو تے سرائیکی دی نامور شاعرہ ہن۔ سوشل میڈیا تے انہاں دے اکثر مشاعرے ݙیکھݨ کوں ملدن۔ انہاں دی شاعری سݨݨ نال تعلق رکھدی اے۔

نمونہ کلام

میں کِھل ہاں سوہݨے چُھوہٙر دی

میں کِھل ہاں سوہݨے چُھوہٙر دی

میݙے اندر ݙُکھی دِھی

میں ہووݨ ہووݨ منگدی ہاں

ہووݨ تے راضی تھی

میں وخت دے تخت دا تاج ہِمی

میݙا ٻُݙدا ویندے جی

میں ہووݨ ہووݨ منگدی ہاں

ہووݨ تے راضی تھی

میں رُل کے آپ کو ڳول ویساں

میں سسؔی ہاں تھل دی

میں ہووݨ ہووݨ منگدی ہاں

ہووݨ تے راضی تھی

میں الف تے لام تے میم ہوساں

میں مومن دی تختی

میں ہووݨ ہووݨ منگدی ہاں

ہووݨ تے راضی تھی

میݙا تیرہاں ویہاں سئّو بݨدے

میں ہیݨے دی دھمکی

میں ہووݨ ہووݨ منگدی ہاں

ہووݨ تے راضی تھی

صباحت عروج

ہک شعر

تیݙی مونجھ کنوں منہ پیلا ہے

میکوں لوک آہدن سفرا تھی ڳئے

ایویں ڳالہیاں ڳالہیں ہوندن ہݨ

ہر کوئی پچھدے تیکوں کیاں تھی ڳئے

صباحت عروج

جیندا اندر ہے خالی

جیندا اندر ہے خالی ، بشر  ݙیکھ گِھن

اپݨاں دل ڈیکھ گھن اپݨاں گھر ݙیکھ گِھن

واقعاتی مسائل دا حل نئیں مِلیا

حادثاتی اِتھاں معتبر ݙیکھ گِھن

موت بندے کوں مسکن بݨا چھوڑا ہے

زندگی ہے اڄاں در بدر ݙیکھ گِھن

اوندے  منزل تے پہنچݨ دا ݙکھ ہے تیکوں

اوندی منزل توں پہلے سفر ݙیکھ گِھن

بندہ بندے دا ڳاٹا لہیندا ودے

اپݨی تبلیغ دا اے اثر ݙیکھ گِھن

پُتراں دی پڳ تے کلفاں لویندا ودیں

چاندی تھیندے ہوئے ِدھیاں دے سر ݙیکھ گِھن

ریت دی ڈھا مقدر دی کندھ کھا ڳئی

ساݙے تھل دے کنارے تے گھر ݙیکھ گِھن

تیکوں اللہ دے نزدیک کر چھوڑیم

این منگالی دے وچ میݙا پھر ݙیکھ گِھن

صباحت عروج

تیــݙی ہـک مسکـــان دے کیتــے

تیــݙی ہـک مسکـــان دے کیتــے

راضــی ہــاں نقصــان دے کیتـے

گھـر دی ڄــاہ میـں دان کریساں

وستــی دے غستـــان دے کیتـے

امــــڑی اپݨــــے ڳـــاݨھــے ویچـے

بچــڑے نــافرمــــــان دے کیتــے

ہنڄــــوں اپݨــے کیتــے رکھئیــم

کِھـل رکھسـاں مہمـان دے کیتے

لکـھ پـڑھ قـول قـرار فضـول ان

تیــݙے ڄھئیـں ٻئیمان دے کیتے

میـݙے کیتـے ڄــان نئیـں ݙینـدا

ݙیســـی پـاکستــــان دے کیتــے؟

روشنـــدان ہـــے چـڑیــــاں کیتـے

چـڑیــــاں روشنــــدان دے کیتــے

رب کوں ٻُکھ نئیں کہیں شئے دی

کڄــھ کـر ڳھـن انسـان دے کیتـے

✍🏻صباحت عروج صاحبہ