Jump to content

شفاء اللہ خان روکھڑی

وکیپیڈیا توں

شفاء اللہ خان روکھڑی (انگریزی: Shafaullah Khan Rokhri) (ڄَمَّݨ دی تَرِیخ: ١٩٦٦ء – فوت تِھیوݨ دی تَرِیخ: ٢٩ اگست ٢٠٢٠ء) ہِک پاکستانی لوک ڳائیک، گیت نگار اَتے موسیقار ہَن۔[١] [٢] [٣]اُنّھاں نے بنیادی طور تے سرائیکی ڳاݨے ڳائے جِنّھاں پورے پاکستان وِچ دُھم پاتی۔ اُنّھاں نے اپݨے پُتر ذیشان خان روکھڑی دے نال رَل تے اپݨے پلیٹ فارم "روکھڑی پروڈکشن" دے تحت موسیقی تیّار کِیتی۔[٤]

شفاء اللہ خان روکھڑی کُوں سرائیکی موسیقی دا لیجنڈ سمجھیا وین٘دا ہِے اَتے اُوہ سرائیکی وسیب دے عطاء اللہ خان عیسیٰ خیلوی دے بعد سبھ تُوں مہان٘درے ڳائیک ہَن۔

ابتدائی حیاتی[لکھو | ماخذ وچ تبدیلی کرو]

روکھڑی ١٩٦٦ء وِچ پنجاب دے شہر میانوالی وِچ ڄَمّے ہَن، اُوہ ابتدائی طور تے پنجاب پُلس وِچ بھرتی تھی ڳئے جاں جو موسیقی وِچ دلچسپی دے پارُوں اُنّھاں نے ملازمت چھوڑ تے موسیقی وِچ اپݨاں مستقبل بݨاوݨ دا اَغاز کر ݙِتّا۔[٥]

موسیقی دا کَم کار[لکھو | ماخذ وچ تبدیلی کرو]

روکھڑی نے اپݨے موسیقی دے کَم کار دا اَغاز ١٩٨٠ء دے ݙہاکے وِچ کِیتا اَتے جَلتی ای سرائیکی لوکاں وِچ مہان٘در حاصل کر گِھدّی۔ اُنّھاں نے اݨ ڳِݨت البمّاں شائع کِیتیاں اَتے ورھیاں دے وِچالے سرائیکی لوک موسیقی دے ہِک مہان٘درے ڳائیک بݨ ڳئے اَتے اُنّھاں کُوں میانوالی نال تعلّق رکّھݨ والے عطاء اللہ خان عیسیٰ خیلوی تُوں بعد ݙُوجھے لمبر تے سمجھیا وین٘دا ہئی۔

بعد دے ورھیاں وِچ اُنّھاں دے پُتر ذیشان خان روکھڑی نے وی اُنّھاں دا ساتھ ݙِتّا اَتے پِیؤ پُتر دی سنڳت نے مردانہ ڳاݨے ڳائے جیڑھے پاکستان دے لوکاں وِچ ٻہوں مقبول تھئے۔ اُنّھاں نے اپݨے موسیقی لیبل "روکھڑی پروڈکشن" دے تحت "فوک سٹوڈیو" دے ناں نال ہِک موسیقی شو وی تیّار کِیتا جین٘دے وِچ سرائیکی وسیب دے ٻِنّھاں فنکاراں دے نال اِنّھاں دے اپݨے ڳاݨے پیش کِیتے ڳئے۔

پِچھوکڑ ݙہاکے دے وِچالے اُنّھاں نے زیادہ تر اپݨے ڳاݨیاں دی اصلاح کِیتی اَتے اِنّھاں کُوں روکھڑی پروڈکشن دے تحت یوٹیوپ اُتّے جاری کِیتا جیڑھے پاکستان وِچ ٻہوں مقبول ہَن اَتے لَکّھیاں ویوز حاصل کِیتے ہِنیں۔ اِنّھاں دے ڳاݨے کئی نویں ڳائیک وی ڳان٘دے ودّے ہِن جِنّھاں نے ڳاݨا ڳا تے مہان٘در حاصل کِیتی اَتے اِنّھاں دے انداز کُوں نقل کِیتا۔

ذاتی احوال[لکھو | ماخذ وچ تبدیلی کرو]

اُوہ پرنے ہوئے ہَن اَتے اُنّھاں دی ہِک دِھی اَتے چار پُتر ہَن۔ اِنّھاں دے پُتر ذیشان خان روکھڑی وی سرائیکی دے مہان٘درے ڳائیک ہِن۔

وفات[لکھو | ماخذ وچ تبدیلی کرو]

روکھڑی ٢٩ اگست ٢٠٢٠ء کُوں اسلام آباد وِچ دِل بند تِھیوݨ دے پارُوں فوت تھئے۔ وزیرِ اعلیٰ پنجاب سردار عثمان بزدار نے روکھڑی دے مرݨ تے اُنّھاں دے ٹَٻَّر نال تعزیت دا اظہار کرین٘دے ہوئے آکھیا جو:

"این٘دے نال سرائیکی موسیقی دا پُکھ بند تِھی ڳیا ہِے اَتے اُنّھاں دی خدمتاں کُوں لَمّے ویلے تئیں یاد رکھیا ویسی۔"

حوالہ جات[لکھو | ماخذ وچ تبدیلی کرو]

  1. https://web.archive.org/web/20200830190536/http://www.radio.gov.pk/29-08-2020/renowned-saraiki-folk-singer-shafaullah-khan-rokhri-passes-away روکھڑی دے مرݨ تے ریڈیو پاکستان دی طرفُوں سرکاری ویب سائیٹ تے جاری تھیوݨ آلی خبر۔
  2. https://www.app.com.pk/national/saraiki-folk-singer-shafaullah-rokhri-passes-away/ پاکستان دے نشریاتی ادارے دی ہِک خبر
  3. سرائیکی فوک ڳائیک شفاء اللہ روکھڑی فوت تھی ڳئے۔ (اردو ٻولی وِچ) اردو پوائنٹ ویب سائیٹ دی ہِک خبر
  4. روکھڑی دے فوت تِھیوݨ تے دنیا نیوز دی خبر (انگریزی ٻولی وِچ)۔
  5. سرائیکی دے مہان٘درے لوک ڳائیک کُوں دِل دا دورہ پِیا تے اُنّھاں کُوں میانوالی وِچ پُور ݙِتّا ڳیا۔ (اُردو اخبار نوائے وقت دی ہِک خبر)۔