سرائیکی قومی سنجانڑسانگے ساریاں سیاسی جماتاں دی مخالفت کرنی پوسی

سرائیکی تحریک سے وابستہ تمام افراد کی توجہ کیلئے ایک خصوصی تحریر.

لکھت رانا ابرار خالد

سرائیکی قومی سنجانڑسانگے ساریاں سیاسی جماتاں دی مخالفت کرنی پوسی!! گزریل ڈوچار ڈینہاں توں (قومی اسمبلی وچ جنوبی پنجاب صوبے دا بل پیش تھیونڑدے بعد) وسیبی سنگت ولوں ڈو موقف سامڑیں آئن، ہک پاسوں صرف ن لیگ کوں سرائیکی دشمن جمات آکھ کےلعنتاں بھیجاں ویندیاں پئین، ڈوجھے پاسوں ’صوبہ صرف سرائیکستان‘ دا نعرہ لاکے جنوبی پنجاب دی مخالفت سامڑیں آئی اے۔۔۔۔۔۔۔۔ہک بیا وی تریجھا گروپ اے جیہڑا حالی تئیں مپ ماری پئے تے پی ٹی آئی دے جنوبی پنجاب کوں خاموش سپورٹ ڈیندا پئے(اے گروپ کڈاہیں پیپلزپارٹی ولوں جنوبی پنجاب کوں سرائیکی قوم سانگے ما بھینر دامندا جانڑدا ہائی)۔ جیہڑی سنگت سکھڑیں ن لیگ تے لعنتاں پئی بھجیندی اے صاف ظاہر اے انہاں پی ٹی آئی کوں ووٹ ڈتے ہن اوں سانگے ووٹ منگیے ہن، تے، انہاں دا وڈامقصد آپڑیں مخالف جمات دا گراف مزید گھٹ کرنڑ اے، مطلب، حب علی گھٹ تے بغض معاویہ ودھیک اے۔۔۔۔انہاں سانگے کئی مسئلہ کائنی، سرائیکی صوبہ بنڑدے یا جنوبی پنجاب، انہاں کوں اے وی ڈسدا پئے جیکر جنوبی پنجاب صوبہ بنڑسی تاں انہاں دی جمات دی حکومت ہوسی، ایں پاروں بہوں سارا فیض انہاں کوں وی ڈھہیج پوسی، ایندے علاوہ اے وی ہوسگدے جو انہاں دا سرائیکی سنجانڑ نال کئی ڈونگھا گانڈھا نہ ہووے تے آپڑیں ذات والی سنجانڑ کوں کافی تے اُتم جانڑدے ہووِن، پرے کروسرائیکی کوں ،سرائیکی نہ اکھویسوں تاں کیہڑا اسمان ڈھئے پوسی، اساں تاں۔۔۔۔۔تھیندوں۔

ہوسگدے جنوبی پنجاب کوں قبول کرنڑوالے یکے سنگتی اینویں نہ سوچیندے ہووِن پرکجھ تاں اینویں ای سوچیندن، کجھ سنگتی اینجھے وی ہِن جیندا سیاست نال گانڈھا گھٹ ودھ اے بلکہ خودکوں سیاسی کارکن دا روپ ڈے کے مہاندرے بنڑن چنہدن، شیئت انہاں کوں اے خبر وی کائنی جوصوبہ انتظامی یونٹ ہوندے یا وفاقی اکائی، او ایندا ادراک وی نئیں رکھیندے جو ہکے وفاق وچ چار وفاقی اکائیاں تے ہک انتظامی صوبہ کیویں چل سگدے، انہاں کوں اے وی نئیں ملوم جوصوبے تے ضلعے وچ کیافرق اے، او تاں سکھڑیں مُہاندرے بنڑن چنہدن، ہوسگدے ن لیگ تے لعنتاں بھیجنڑ والیں وچوں کجھ اے وی سمجھدے ہووِن جو پی ٹی آئی صوبہ بنڑیسی تاں اگلا الیکشن وی وسیب وچوں جھُنڑ ویسی (مطلب، انہاں دا مقصد صرف پی ٹی آئی کوں تکڑاکرنڑاے، بیا کجھ کائنی)۔۔۔۔۔۔۔۔۔۔۔۔۔انہاں کوں ایں گالھ نال وی کئی غرض کائنی جوسرائیکی وسیب تقسیم تھیندا پئے، جیکر جنوبی پنجاب صوبہ بنڑسی تاں اے آبادکاراں دا صوبہ ہوسی، وفاق پاکستان وچ رہندڑ ڈوجھاں قوماں ہکے وفاق وچ ڈوپنجاب قبول کریسن یا نہ کریسن۔۔۔۔۔انہاں کوں صرف صوبہ چہیدا اے توڑے جو یارھاں ضلعیں دا صوبہ ہووے!! جنوبی پنجاب کوں سپورٹ کرنڑ والا پہلا تے تریجھا گروپ اصل وچ ہک پیج اُتے ہے، انہاں کوں کئی خیال کائنی جو سرائیکی تحریک کتھوں شروع تھئی، کیں ایندے سانگے کیا کیا قربانیاں ڈتیا، ممتازحیدرڈاہر، میرحسان الحیدری چانڈیو، چاچاغلام محمدخاں ہانبھی،استاد فداحسین گاڈی، ریاض ہاشمی، زمان جعفری، استاد اعجاز، استاد اعجازبلوچ، سرورکربلائی، استادنورمحمدسائل، کامریڈمنظوربھوہڑ، کریم نوازمنصف کورائی، قیس فریدی، رازجتوئی، حمیداصغرشاہین، بیرسٹرتاج محمدلنگاہ، اسدخاں لنگاہ، صوفی صبغت اللہ مزاری، منیراحمددھریجہ، میاں انیس دین پوری، عبداللہ عرفان ملک، سیٹھ عبیدالرحمن، ظہوردمانی،سعیداخترسیال، صوفی تاج گوپانگ، عاشق بزدار، شیخ افضل، غلام مصطفیٰ خاں، مشتاق فریدی، سفیرلشاری، انجم لشاری، فقیرا بھگت، اکبرخاں ہوتانی، اکبرخاں ملکانی، مسعودافضل، بشیرانصاری،شاہدجتوئی، شبیرحسن اختر، واحدبخش خاں رند، غلام رسول ڈڈا، احمدخاں طارق، کامریڈعبدالکریم ڈمرہ، شفیع بھوہڑ، جام تاج برڑہ،اسلم رسولپوری، محمداسمٰعیل احمدانی، اشولال، رفعت عباس، ڈاکٹرنعیم کلاسرا، ڈاکٹرنصصراللہ ناصر، پروفیسراکرم میرانی، رضوشاہ، خواجہ ضیا، شمیم عارف قریشی، عبدلمجیدکانجو،صادق بزدار،مظہرنوازلشاری، مغل اعظم کانجو، مظہرسعید گوپانگ، راشدعزیزبھٹہ، عبیدخواجہ، اسمٰعیل ڈاہر، عباس ڈاہر، سیف اللہ مستوئی،غلام رسول گرمانی، استتاد نزیرفیض مگی، استاد الہ ڈتہ بدنام، کیفی جام پوری، طارق اسمٰعیل احمدانی، شبیرلکھیسر تے ڈھیر سارے بئے سنگتی جنہاں سرائیکی تحریک دا بوٹا لاونڑ سانگے کیا کیا بھوگ بھوگیے ،کیویں آپڑیں لہودا اینکوں پانڑیں ڈتا، کیا کیا ایں کازسانگے قربان کیتا، کیں اپڑیاں جوانیاں تحریک پچھوں وار ڈتیاں کون بڈھیپے وچ شہرشہر وستی وستی رُلدا ریہا۔۔۔۔۔اج فیس بک تے بیٹھا ہک جنوبی پنجابی اہدے، اوئے توں کون ایں کیا بکواس پیا کریندیں، توں پی پی پی دا ایجنٹ ایں ، تیڈا دماغ چل گئے۔۔۔۔۔ساڈا صوبہ بنڑن ڈے، پرے چخے تھی۔

گال تاں صحیح اے، دماغ چل گیا ہا، ممتازحیدڈاہر دا، جیہڑا رحیم یارخاں ضلعے دا ہک چنگاں بھلافیوڈل ہائی، اونکوں خبرہائی میکوں کینسراے، ڈاکٹریں آکھیا، تیڈاعلاج لندن تھیسے۔۔۔۔۔۔پر، او سرائیکی تحریک سانگے زمیناں ویچ کے لیندا رہ گیا، اپڑیں علاج سانگے ہک مرلہ نہ ویچا۔۔۔۔دماغ چل گئے، واقعی دماغ چل گیا، عاشق بزداردا۔۔۔۔جیندا ابا اسی مربعے دا زمیندار ہائی، پرعاشق بزدار آپڑاں سب کجھ سرائیکی تحریک تے لاچھوڑئیے(بالیں سانگے وی کجھ نئیں بچایا)۔۔۔۔۔ہا یار، دماغ چل گیا ہائی کامریڈ منظوربھوہڑدا، جیہڑا سن ستردے ڈہاکے دا ہک وڈا وپاری ہائی، پراوں ساری زندگی تحریک کوں ڈے کے فقیریں وانگوں گزاری۔۔۔۔۔۔۔۔۔ہا یار، دماغ چل گیا ہائی جام تاج برڑے دا، جیہڑا جام بخش مند دا پتر ہائی،جام بخش مند جیں کن گورچانی سردار اے آس رکھ کے آندے ہن جو چنگاں ٹکروی اتھائیں ملسی تے گھوڑئیں دا گھا وی لبھسی، پرجام تاج برڑے آپڑیں زندگی سرائیکی تحریک کوں دان کرچھوڑی۔۔۔۔۔اج کینکوں خبراے جو صوفی صبغت اللہ مزاری سرائیکی تحریک دا پہلا شہیدا ہائی تے مغل اعظم کانجو ڈوجھا شہید!! ادا جنوبی پنجابی آ۔۔۔۔۔۔توں حق تے ایں ،توں شہزادعرفان ملک تے عبیدخواجہ کوں ٹھکا مینہڑا مار سگدیں، سرائیکی وسیب دا درد اے تاں وسیب وچ ول کیوں نِوھے آندے۔

تیکوں سریر نئیں آندی جو دیرہ ، ملتان بہاولپور، رحیم یاررخاں، فاضل پور وچ تیڈے بال گھروچ اردو الیندن ، شہزادعرفان ملک تے عبیدخواجہ دنیا دے سب توں ترقی یافتہ ملک دی سب توں ترقی یافتہ ریاست کیلیفورنیا(جینکوں سلیکان ویلی آکھیا ویندے)اُتھا رہ کے وی انہاں دے بال سرائیکی بولیندن تے انہاں کوں نانی بڈھڑی دا قصہ سُنڑکے نندر آندی اے!! وسیبی سنگت دا ڈوجھا گروپ جیہڑا صرف سرائیکستان دا نعرہ لاکے جنوبی پنجاب دی مذمت کھڑا کریندے،(او ن لیگ تے وی اونویں لعنت بھجیندے، پرجنوبی پنجاب دی سازش داشکارتھی کے اسٹیبلشمنٹ دا ٹائوٹ نئیں بنڑدا) او برحق اے، پر اونکوں سوچنڑا پوسی جو، کے تئیں صرف فیس بک تے، گھر وچ بہہ کے مذمت کرکے کم چلیسی، پیپلزپارٹی انوھی سوچوہترتوں ہنڑتئیں سرائیکی تحریک،وسیب سانگے جو کجھ کیتے، اساں اوندا آدُرکریندون، بھٹوصیب دا، بی بی سینڑدا، زرداری صیب، بلاول سئیں، یوسف رضاگیلانی سئیں دا لکھ تھورا، انہاں سرائیکی وسیب/قوم سانگے بہوں کجھ کیتے ۔۔۔۔۔پر، اج پیپلزپارٹی ولوں جنوبی پنجاب دا ورتارا سرائیکی سُنجانڑ دے دشمناں کوں فل سپورٹ پیا کریندے، ساکوں کٹھا تھیونڑا پوسی، ہک نویں موومنٹ دا مُنڈھ بدھڑاں پوسی، اپڑیں اگوانڑین دے رکھیے ایرے تے کندھ اُسارنڑیں پوسی، ساکوں ہنڑ آپڑیں تحریک آپڑیں قومی سنجانڑ کوں مرنڑ توں بچاونڑسانگے ن لیگ، پی ٹی آئی سودھا پیپلزپارٹی دی وی مزمت کرنڑی پوسی، میں منینداں پیپلزپارٹی لیڈرشپ دی کئی مجبوری ہوسی، پیپلزپارٹی کوں مجبوری توں کڈھنڑ دا وی ہکو رستہ اے جواساں ہنڑ آپڑیں پیریں بھرتھی کے ٹروں، جیکر مستقبل وچ پیلپزپارٹی ساڈی سنجانڑ کوں آپڑاں مطالبہ بنڑایا تاں سراکھیں تے، نتاں اساں اونکوں ڈھیرمجبور نہ کریسوں۔۔۔۔۔۔۔کیوں جو سُنجانڑ مُتوں کجھ وی کائنی ہوندا۔۔۔۔!!!!!