سرائیکی اردو رسالہ معاشرہ

1986/87 ءچ ملک عبداللہ عرفان ہوراں سرائیکی/ اردو رسالہ " معاشرہ" کڈھیندے ہن۔ جیندے ءچوں انہاں دا اپنْے محبتاں آلے سنگتی بھرا تے تنظیمی ساتھی سئیں محترم عاشق بزدار دی کتاب " اساں قیدی تخت لہور دے" کوں وسیب دی پہلی شہید کتاب آکھے نے تہوں سرائیکی جدید مزاحمتی ادب ءچ ایندی لوڑیند تے اہمیت شئیت آونْ آلے ہر ویہلے دا پہلا پنّاں بنْسی۔

نویں نسل کوں ایں حقیقت دا وی علم ہونْ ضروری ء جو جڈنْ جو اے کتاب چھپی ہائی سرائیکی شاگرد سانجھ (جیہڑی جو سیاسی طور تے لوک سانجھ توں زیادہ متحرک تے منظم ہائی) کیتے ہک مکمل سیاسی منشور دا درجہ بنْ گئی البتہ انگلیں تے گیننْویں چار توں پنج تے بھانویں چھی ٹھکنْ دانشور/ادیباں چُنڈاں گُھتاں ءچ سر جوڑ اے آکھدے بیٹھے ہن جو " نظم ہوے تے بھانویں نثر اوکوں سیاسی اشتہار نئیں ہوونْا چاہئیدا اے تاں عاشق خاں پروپیگنڈا ادب پیا لکھدے"۔۔۔ پر وقت نے انہاں تے ثابت کیتے جو ادب برائے ادب توں انکار کوئی نئیں پر مزاحمتی تحریکاں ءچ سُنجانْ تے حقوق دی چومُکھی بھڑاند ءچ صرف اوہو ادب لوکائی دا بیانیہ بنْدے جیہڑھا اندروں باہروں تبدیلی دا یقین ڈیواوے۔ سئیں عاشق بزدار ہوراں دا ثقافتی ادراک بلآخر سیاسی جدوجہد تے آنْ مُکدے۔ باقی اپنْے ماضی دی یاداشتاں تے تجربات کوں اکھراں ءچ ڈھال پنْاں ءچ سلہاڑ تے ہک چھوڑ کئی کتاباں لکھیاں ونج سگیندن پر " اساں قیدی تخت لہور دے" سواں قومی مسودہ ہر کتاب دے نصیب ءچ نئیں آندا۔

شہزاد عرفان