بی بی سی، لندن

چاچا نورا ڈو بینڈ دا سعودیہ آلا ریڈیو کچھ اچ پا کے دیگر نال بی بی سی دے ٹیشن دیاں خبراں دا تانگھی تھی ونجے ہا، ڈاند رہڑی ودھا ،ڈاند کیکر دی چھاں تلے بدھ کے پالہا تھیونڑ بعد ،پہلے آل انڈیا ریڈیو دی اردو سروس ،لتا تے رفیع دی آواز ، پیارے لال تے آر ڈی برمن دیاں دھناں تے طبلے دی سنگت چاچے نورے دی ٹالی تلے سٹی ہوئی منجی ، پگو دے واندھے پانڑیں دے نغال دیاں موسیقی دے ُ سر کھنڈیندیاں اوازاں ،بالہاں دا ککاریاں مریندیں ہوئیں ونڑاں تلے ہک بئے دے پچھوں دھروکڑیاں لاونڑاں ،ایں سارے ماحول کوں انڈین گیت گرماون ہا ،تے چاچا نورا سرانڑاں سر تلے رکھ تے سمے ہا ، کچے امب پھودنے ،ساویاں مرچاں تے ٹماٹراں دی چٹنڑی ،ہک ڈو پیلے پکے پکے خربوزے تے کچے وصلاں دا نبو دے رس آلا سلاد ،مکھنڑ نال چوپڑیاں ہوئیاں او روٹیاں جہڑیاں چاچی فضلاں دھمی ویلے تنور بال کے پکائیاں ہن ، ترے وجے ڈینہہ کوں ہک چنگیر اچ جڑئیاں ہوئیاں چاچےنورے دے سامنڑے ہوون ہا۔ چاچا چوپڑیاں روٹیاں آلے تھندے ہتھ نال مچھاں کوں ُ کولا ہتھ مار کے انگلیں دا مروڑا ڈیوے ہا تاں ایویںں لگئیے آ جو ایں پرے تئیں دگری وستی اتے چاچے نورے دی حکومت اے ،وستی اچ صرف ہوندے کول ای ایہو جیاں ڈبہ ہے جہڑا بی بی سی دے ناں نال سچیاں خبراں سنڑویندے ،حق سچ پاروں اے ریڈیو کلہا سپاہی اے جہڑا امریکہ دے چٹے کوڑاں دے خلاف ڈاہڈی جنگ لڑدے ، چاچا نورا بی بی سی کوں غریب ملکاں دا خیرخواہ سمجھدے ،پوری دنیا اچ امن اے ، 65 دی جنگ ،اسرائیل تے فلسطین دے قبضے وچ پھتھے علاقیاں پاروں تھیونڑ آلے تنازعے ، کوئ ہلکے ہتھیاراں نال فائرنگ داواقعہ ، پر اے معاملے وی چاچے کیتے بہوں اہم ہن ،او فلسطین کوں آزاد ڈیکھنڑاں چاہندے ، اسلامی ملکاں کوں ہک مٹھ ڈہدے تے کشمیر دے معاملے کیتے بے چین اے ،گاوی لسی دی گڈوی پی کے ،او تسلی دا ڈکار ڈیندیں ہوئیں ،شور کریندے بالاں کوں دڑکا چڑھیندے ،تاں بالہہ گھراں در ُدوس لیندئن ،دیگر 6 وجے ریڈیو دی سوئ 1035 کلوہرٹز دے آندی اے ،ملتان دے سٹیشن توں ،مہر تے ملک دا پروگرام ۔۔جمہور دی آواز لگ ویندے ،چاچا منجی سرانڑاں تے ریڈیو چیندا ، گھر دے کچے حویل دے وڈیل سرے دے کھٹ سٹ کے پروگرام سنڑدے ،چاچا عاشق، چاچا محمد حسین ،چاچا فیضو تےاساں چھوہر چھٹکر ریڈیو دے نیڑے آ لگدے ہیں ، جمہور دی اواز بعد ،ڈرامہ لگسی ،،،نکا کاکا ،وڈا کاکا ،، زنانیاں چلہانڑے دے چوکیاں اتے بہہ کے حال حویل دی بیٹھیاں سریندئین ،، اہم گالہہ چاچے نورے دے پتر ،،ِ میرے ،، تے اوندی سوتر بختو دے رشتے دی اے ، ِ میرا،، بختو دا دیوانہ اےتے بخت وی اوکوں پسند کریندی اے ، پر چاچے نورے دے وڈے بھرا ،شبیرے کوں ،بختو ،،ہک اکھ نی بھاندی ، کیوں جو او بختو کوں ، ،ِ ِ میرے ِ،، دے مقابلے وچ ان پڑھ تے آواری سمجھدے ، ِمیرا ،ڈاہ جماعتاں پاس اے تے او خودکوں ہنڑ امیر بخش سڈیجنڑ پسند کریندے ،،،تے بی بی سی دے پروگرام سیربین ،،، بارےاوندے تبصرے ساری وستی وچ منئیے تے جانڑیئے ویندئین ،،، وڈی حویلی اچ کھٹاں سٹیج گئین ، ڈنگر ڈھور بھانڑیں بدھ کے ، ِ میرا ،گھر دی چھت دےکھٹ گھت کے ستا پے ، پانڑیں دا وارہ بدھنڑ کیتے کہی کول پئ اے ،بارہوں باغ آلے پاسوں ِ گدڑاں دیاں اوازاں ہن ، کتے بھونک بھونک ِ گدڑاں کوں ڈریندے پیئن ، رات دے ہک وجے دا ویلا اے ، گھر دے بارہوں باغ اچوں روونڑ تے دھاڑ بڑنڈ دی اواز اے ، چاچا نورا ڈانگ چا مچھ کوں وٹ ڈیندا ،منجھلی دی ٹیبک بدھیندا باغ آلے پاسے بھجا ویندے ، بختو دے روونڑ دی اواز اے ، پر اتھاں کوئ بیا بندہ نی نظر آندا پیا ، بختو ، امب دے گھاٹے گھیر آلے پاسے اشارہ کر کے دھاڑ کیتی اے ،،،، ہائے اللہ میں ُ لٹیج گئی آں ،،، چاچے نورے امب آلے پاسے ڈانگ بھنوائ اے ، ِ میرا کوٹھے دی چھت دوں درک مار کے بھجے ، چاچا نورا بھوئیں دے ڈٹھا پئے ، ڈڈھ وچوں خون پیا سمدے ، چاچا دے چھیکڑی ساہ ہن ، زنانیاں وینڑ پیاں کریندین ،، کئ بندہ تکھے قدمیں بھجدا ہویا ، باغ اچ گم تھی گے ، جیندے ہتھیں ،ایں وستی اچ پہلی واری لوکیں بندوق ڈٹھی اے ،،، وستی دا پہلا بندہ گولی نال مارئیا گئے ، گولی چلاونڑ والا چاچے شبیرے ،کنوں علاوہ بیا کئ نی تھی سگدا ،،، پر ، ہک گالہہ بہوں عجیب اے ، ،ِ میرے دا سوتر چاچے شبیرے دا پتر ،، بہوں گھابرئیا ہوئے ،،، وستی دے سارے لوک اے جانڑدئن جو چاچا شبیرا بندوق چلاونڑاں نی جانڑدا ،،،،، میرا ،بختو ،،،تے سارے گھر آلے چپ ہن ، وستی چپ اے ،، چاچے شبیرے دی اواز نی پئ نکلدی ،،، وزیرا دھاڑیں مار مار کے روندا پے ،،،، بی بی سی توں رات دا چھیکڑی بولیٹن ،،،پشتو وچ نشر پیا تھیندے ،، دا لندن دا ، دا بی بی سی دا چلنڈو پرستوخ پاراوانا دا ، دئ دا مخپریجی ،،،،، پر اج چاچا نورا چپ اے ۔۔۔