بائبل وِچ زنانیاں

بائبل وِچ کنعان دی زنانیاں دی تصویر کشی۔

بائبل وِچ زنانیاں (اردو: بائبل میں خواتین) (انگریزی: Women in the Bible) دے بارے مرد کرداراں دے مطابق گھٹ اِی ذکر ہِے۔ بائبل دے بیان دے مطابق خُدا نے اُنّھاں کوں مرداں آلی کار برکت ݙِتّی اَتے آکھیا جو پَھلّو تے وَدّھو اَتے بھوئیں کُوں معمور تے محکوم کرو اَتے سمندر دی مَچّھیاں اَتے وَا دے پَکّھیاں اَتے کُل زانوراں اُتے جیڑھے بھوئیں اُتے ٹُردے ہِن اِختیار رکّھو۔

بائبل وِچ خُدا نے ٹَٻَّر دا نظام بݨایا اَتے اَمّاں اَتے اَبّا ݙُون٘ہائیں دی ہِکّو جئیں عزّت مقرر کِیتی جیویں جو آکھیا ڳیا ہِے: "ݙیکھو! اَل خُداوند دی طرفُوں میراث ہِے۔ اَتے ڈِھݙ دا پَھل اُون٘دی طرفُوں اَجر ہِے"۔

"کیوں جو خُداوند نے فرمایا ہِے جو تُوں اپݨے پِیؤ دی اَتے اَپݨی اَمّاں دی عزت کریں اَتے جیڑھا پِیؤ یا اَمّاں کوں بھیڑا آکھے اُوہ ضرور جِند تُوں ماریا ویسی"۔

ہِک ٻئی جاء تے آکھیا ہِے جو: "اَے پُترو! خُداوند وِچ اَپݨے اَمّاں اَبّا دا آکھیا مَنَّݨ آلے رہوو کیوں جو اِیہ واجب ہِے۔ اپݨے پِیؤ دی اَتے اَمّاں دی عِزّت کرو۔ جاں جو تیݙا بَھلا تِھیوے اَتے تیݙی حیاتی بھوئیں اُتے لَمّی تِھیوے۔"

زنانی اَتے گناہ

بائبل وِچ لِکّھیا ہِے جو جِہڑیلے آدم تے حوا کُوں خُدا نے باغ عدن وِچ رہایا تاں اُنّھاں اُتّے اِیہ پابندی لائی جو اُوہ علم دے ہَٹکے ہوئے وݨ دے پَھل کُوں ناں چَھکِّھن۔ آدم تاں شَئیت اِیں حکم دی پابندی کرین٘دے، جاں جو حوا کِیتے اِیہ تجسس دی جاء ہئی جو بَھلا اِیہ قدغن کیوں ہِے اَتے اِین٘دی خلاف ورزی دے کیا نتیجے نکلسِن۔ تہُوں بائبل دے مطابق اُوں نے آدم کُوں اُکسا تے اِین٘دے تے اَمادہ کِیتا جو اُوہ پابندی تروڑ تے وݨ دے پھل کُوں چکِّھن اَتے جِہڑیلے اُنّھاں نے اِیں پَھل کُوں چَکھیا تاں اِنّھاں وِچ نیکی اَتے بدی اَتے شرم دے احساسات آ ڳئے۔ خُدا نے اپݨے حکم دی اِیں خلاف ورزی تے ݙُون٘ہائیں کُوں باغِ عدن توں کَڈھ ݙِتّا۔ مسیحیت وِچ اِیں واقعے کوں بنیادی گناہ آکھیا وین٘دا ہِے اَتے جنّت تُوں کَڈّھے ون٘ڄݨ کوں فال آف آدم یا آدم دا زوال آکھیا وین٘دا ہِے۔ اِین٘دی وجہ توں پُراݨے مسیحی ادب توں زنانیاں کُوں گناہ دا موجب تے محرک سمجھیا وین٘دا رِیہا ہِے۔  

ٻِیا ݙیکھو

• مسیحیت وِچ زنانیاں
• یہودیت وِچ زنانیاں
• اسلام وِچ زنانیاں