ہائر ایجوکیشن کمیشن، پاکستان

پاکستانی ہائر ایجوکیشن کمیشن پاکستان اچ حصولِ اعلیٰ تعليم دا بنيادی، منتظم تے معاون ادارہ ہے۔ اِیندا اہم مقصد تے ذمہ داری پاکستانی جامعات دی تجديد ہے تاکہ اُنھاں کوں تعليم تے تحقيق و تعمير دا مرکز بنايا ونڄ سڳے۔

قیام تے مقاصد

ہائر ایجوکیشن کمیشن دا قیام پاکستان اچ اعلیٰ تعلیم دے فروغ تے نوجوان نسل دی صلاحیتاں کوں ملک و قوم دے بہترین مستقبل کیتے استعمال کرݨ کیتے کیتا ڳیا۔ہائر ایجوکیشن کمیشن دے مقاصد و اہداف اچ اولین ترجیح تحقیق دی ترویج و اشاعت تے عالمی سطح تے پاکستانی نوجواناں دی صلاحیتاں کوں اجاگر کرݨا ، تحقیق دے شعبے وچ معیار کوں بہتر بݨاوݨا تے اعلیٰ تعلیم دے فروغ کیتے فنڈز دی تقسیم کار دا نظام وضع کرݨا شامل ہے۔ ہائر ایجوکیشن کمیشن جیہڑا کہ پہلے یونیورسٹی گرانٹس کمیشن دے ناں نال ڄاݨا ویندا ہئی، پرویز مشرف دے دور اچ ہائر ایجوکیشن کمیشن دے ناں نال ازسرنو تشکیل پایا جیندے چیئرمین ممتاز ماہر تعلیم ڈاکٹر عطاءالرحمان نے ایں ادارے کوں عالمی سطح تے ہک بین الاقوامی معیار دا ادارہ ثابت کیتا۔ ہائر ایجوکیشن کمیشن نے مختلف ادوار اچ تعلیم دے فروغ ، فنی مہارتاں دی ترویج تے تحقیق و تدوین دے شعبیاں اچ گراں قدر خدمات سرانجام ݙتے ۔ ہائر ایجوکیشن کمیشن نے سکالرشپس تے تعلیمی وظائف دے ذریعے اعلیٰ تعلیم دے خواہاں طلبہ و طالبات کوں استحقاق تے میرٹ دی بنیاد تے اندورن ملک و بیرون ملک تعلیم دے شعبے اچ اپݨے صلاحیتاں دا لوہا منواوݨ تے روزگار دے حصول اچ خاطر خواہ معاونت فراہم کیتی ۔ ہائر ایجوکیشن کمیشن دے تحقیقی ، تخلیقی ، سائنسی تے فنی میداناں اچ کارہائے نمایاں زبان زدِ عام ہن۔