کلیم احسن عرف شاہ جی

اصل ناں       کلیم احسن لُنڈ

المعروف        شاہ جیؔ

جٖمنْ           1967ء

تعلیم          گریجوایٹ

پیشہ            زمیندارہ

فون نمبر        0333 8574416

جاہ پتہ         شادن لنڈ تحصیل و ضلع ڈیرہ غازیخان

شعری مجموعہ ’’تماشا‘‘ دے خالق کلیم احسن المعروف شاہ جی دا تعلق قصبہ شادن لنڈ دے لنڈ قبیلے نال ہے ، آپ درویش صفت شاعر ہن، انہاندے حوالے نال شادن لنڈ دے ای معروف شاعر تے نثر نگار قاسم سہانْی لکھدن جو ’’کلیم احسن دی شاعری دے پچھوں کیا راز ہے ،کیڑھے ڈٖکھ ہن، کیندیاں ڈٖاتاں ہن ، ایندے بارے کلیم احسن جٖانْدے یا اللہ جٖانْدے۔نمونہ کلام حاضرِ خدمت ہے۔

غزل

ساڈٖی محفل میل اچ ہوندیں میل ملیونْ او نئیں ڈٖیندا

ڈٖیکھنْ جوگٖا ڈٖیکھنْ ڈٖیندے،مونجھ مرئیونْ او نئیں ڈٖیندا

جام چھلکدے اکھیں وچ او مرضی تے پلویندا ہے

تسّا مرنْ او نئیں ڈٖیندا ، رجٖ کے پیونْ او نئیں ڈٖیندا

جڈٖاں ملے رستے وچ او بغل بھر کے ملدے پر

چہرہ ڈٖیکھنْ او نئیں ڈٖیندا ، قدمیں نیونْ او نئیں ڈٖیندا

اوندی چپ تے میں اکثر چپ چاپ الینداں بے مقصد

ڈھیر الاونْ او نئیں ڈٖیندا ، لب کوں سیونْ او نئیں ڈٖیندا

ساڈٖا اوندا رشتہ کیا ہے ، ایہا ڈُٖپ ڈُٖپ ویندی پئی ہے

ساڈٖی محفل میل اچ ہوندیں میل ملیونْ او نئیں ڈٖیندا