ڈائری دا پنا 48

ڈائری دا پنا : 48

مٹھی شہر سُنڑہپ دی کہیں تاکڑی وچوں باہر جھاتی پیا پیندا ہا ' ایہ شہر اپنڑے وحدت الوجود وچوں باہر پیا نکلدا ہا ' مٹھی دے 'اساں' دے شیشے وچ 'میں' دا چمکارا پیا پوندا ہا ' مِٹھی دی وحدت وچ پاندھیاں دے آونڑ تے ونجنڑ دی گنجائش ہئی ' ایہ شہر رومان توں حقیقت تے حقیقت توں رومان دے در پیا کُھلیندا ہا ' مٹھی وچ سرائیکی ہک شاعر دے آونڑ دی لکڑ تار کل دیگر ویلے ہَل گئی ہئی ' اہدن جو پرانڑے مٹھی دی روایتی لکڑ تار ٹیلی فون تار توں ودھ کر ہئی ' کوئی پاندھی مٹھی وچ لاہوے ہا تاں پورے ایں شہر کوں خبر تھی ونجے ہا ' مور چھت اُتے بولے ہا کوئی آ گیا ہے ' کاگا کندھی اُتے کرکے ہا کوئی آ گیا ہے 'بزاراں دکاناں چوکاں تے گالھ ٹُرے ہا کوئی آئے ' کون آئے ؟ تھوڑی دیر وچ مٹھی کوں خبر تھی ونجے ہا ' خلیل آکھیا " بھائی یہ نیا مٹھی ہے پر تیرے آنے کی بھی لکڑ تار ہَلی ہے ..... "اور جانے کی لکڑ تار " پُچھیم.... "نہیں, تم ملتان سے ہو آؤ مٹھی تمہیں نہیں جانے دے گا " مٹھی وچ دھمی دے اٹھ وج گئے ہَن ' تھر لاری اڈے توں پئے ٹُردے ہاسے ' مٹھی نال ول آون دا وعدہ کیتا جینویں اپنڑی بڈھڑی ما نال وعدہ کریندا ہَم تیکوں کل مائی بڈھڑی دا قصہ سُنڑویساں ' بُھل ونجاں ہا ول کئی ڈینہواراں بعد ونجاں ہا تاں اماں کِھل پووے ہا ' مٹھی دی سبھ توں سوہنڑی سڑک توں گزردے پئے ہاسے ' نویں رنگ دے گھر ہَن ' ایہ سڑک مٹھی دے دروازیاں توں باہر تھر دے ہاں وچ لاہندی ہئی ' ایں سڑک دے ڈوہیں پاسوں درخت ہَن ' ایں سڑک تے مور مرضی نال ٹُردے ہَن ' ایں سڑک دے چھیکڑی بوہے باہروں کیفے تھر ہا جتھوں سجے ہتھ امر کوٹ دا رستا ہا۔ رفعت عباس۔