ڈائری دا پنا 19

ڈائری دا پنا : 19

ننگر پارکر دی سویل ہئی ' خلیل کنبھار چھ وجے سبھ کوں جگا ڈتا ہا ' اساں ننگر پارکر توں کارونجھر دے نال نال پورب دو ونجنڑا ہا 'اتھوں ڈاہ بارھاں کلو میٹر تے بھارت دا بارڈر ہا تے پار کَچھ پیا وسدا ہا جتھاں رنڑ آف کچھ دے شیشے وچوں وساکھ توں ہاڑ تئیں چلکارا ہک اسمان تانڑیں پوندے : دیکھ تو دل کہ جاں سے اُٹھتا ہے یہ دھواں سا کہاں سے اُٹھتا ہے اساں بس چا پیتی جو نِرہانڑ دا اہر اگوں خلیل دے سنگتیاں نے سِتریا ہا ' شہر توں نکلدیاں خلیل موٹر روکی ایہ رستہ روپلو کوہلی دے گاؤں دو پیا ویندے اوں آکھیا "اِتھاں اوہ ونڑ ہا جتھاں انگریز سندھی قومی مزاحمت دے سورما روپلو کوہلی کوں پھاسی ڈِتی ' گوریاں پہلے روپلو دی تلی وچ تیل پاتا, انگلیاں تے وٹ چڑھائی تے بھا لا تے ہتھ کوں ڈیوا بنڑا ڈِتا پر روپلو نہ بولیا ' اوں کارونجھر وچ لُکیے تے دھاڑل انگریز نال بِھڑدے اپنڑے سنگتیاں دی کَو نہ ڈِتی ' سندھ دا ایہ پُتر 22 اگست 1858 کوں پھاسی چڑھ گیا ..... "ایں واقعے توں ڈاہ سال پہلے 1848 وچ انگریز ملتان دے بوہے باہروں کٹھا پیا تھیندا ہا " میں خلیل کنبھار تے شوکت ہنگورجو کوں ڈسیا۔ رفعت عباس (रफ़ात अब्बास)