پلاک اتیں سرائیکی شاعر و لکھاری

"کوآپشن" ، پلاک اتیں سرائیکی شاعر۔ لکھاری انگلش دا شَبد "کوآپشن" ٻہوں دلچسپ ہے اتیں سیاست نال ایندا ڳوڑھا سانگا ہے۔ جے ایں شبد دی وݨت وچ ونڄوں تاں ایندے وچ "آپشن" کنیں پیلھوں "کو" دا سابقہ لڳیا کھڑے۔ ساکوں ڄاݨ ہے جو انگلش وچ "کو" دا سابقہ کہیں جوڑ کیتے ورتیا ویندے۔ ایں طرانح نال "کو آپشن" دا ارتھ (معنی) بݨدے ہکو سنواں آپشن ۔۔ موقعہ ۔۔ مفاد بݨاوݨ۔ جے ایں ارتھ (معنی) کوں اڳوں رکھ کنیں ایندا ورتارا ݙیکھوں تاں انگلش وچ اے سبھ کنیں ودھ پالیٹکس یا راج نیتی وچ ورتیندے۔ کوآپشن اصل وچ پالیکٹکس وچ ہک سٹریجی ہے جیندے نال اپݨے مخالف کوں اپݨی شرط نال اپݨے نال ملایا ویندے۔ اونکوں اپݨے مفاد نال جوڑیا ویندے تاں جو او اپݨا مفاد چھوڑ ݙیوے تے ٻئے مخالف دے مفاد نال ڳنڈیج ونڄے۔ ایں کم کیتے کیا تے کینجھی ترغیب ݙتی ویندی ہے، اے کوآپشن دی سٹریٹجی دا ٻݨیادی نکتہ ہوندے۔ جݙاں دا سرائیکی تحریک وچ تکھپ آئے، ایں ودھیک سیاسی شکل گیدھی ہے، ساکوں پنجابیں دے اداریں دی پاسیوں سرائیکیں دی کوآپشن دی ہک نُشابرسٹریٹیجی نظردی ہے۔ ایندے وچ اڳوں اڳوں پلاک ہے۔ ا صل وچ ایں کوآپشن دا عمل پیلھوں لہور دے این جی اوز کنیں شروع تھیا۔ لہور دے کئی این جی اوز سرائیکی وسیب دے سیاسی کارکنیں دی کوآپشن کر کنیں اُنہیں کوں نال رلایا۔ وت ایں سانگے ہک سیاسی پارٹی بݨاوݨ دا ترلا وی کیتا ڳیا۔ جݙاں اے کم نہ چل سڳیا تاں اسلام آباد وچ لوک ورثہ دے ادارے کوں ما ٻولی دے عالمی ݙینہہ دے حوالے نال ایں کوآپشن دا ہک ڈھالا بݨاوݨ دا ترلا تھیا۔ این جی اوز نال جُڑے سرائیکیں کوں اڳوں کر کنیں سرائیکی شاعریں تے لکھاریں کوں پنجابی لکھاریں نال کٹھا بہلاوݨ دا انتظام تھیا۔ میکوں یاد اے جݙاں اے کم پیلھے شروع تھیا تاں اوندے پروگرام وچ احسن واگھا تے میݙا ناں پروگرام وچ نُشابر ہئی۔ جݙاں اساں انکار کیتا تاں وت کئی ٻئے لکھاری تے شاعر اڳوں آڳئے۔ ایں حوالے نال احتجاج تھیندا ریہا تے اے ریکارڈ اُتے ہے۔ ایں کوآپشن دے بھنے ترٹے ترلیں بعد پلاک کوں اوندے سارے سرکاری وسائل نال اڳوں کیتا ڳیا۔ ایں کم کوں بھلا تھیوے رفعت عباس سئیں دا جو اُنہیں پیلھے مرحلے وچ ای پنکچر کیتا۔ پر اے سلسلہ نہ رُکیا تے اڄاں تائیں چلدا پئے۔ ایں ساری "کوآپشن" دا وݙا نکتہ ہکو ہے جو سرائیکی تے پنجابی دے وکھرپ کوں دُھندلا کیتا ونڄے، سرائیکی شاعریں تے لکھاریں کوں کُجھ پیسے، کُجھ لہور دے دورے تے کُجھ مشہوری دی ترغیب ݙے ایں مقصد کیتے ورتیا ونڄے۔ ساکوں ڄاݨ ہے جو شاعریں تے لکھاریں دی اکثریت اینجھی ہوندی ہے جیڑھی انا تے خود پسندی دے جادو وچ ہوندی ہے۔ انہیں دا سارا زور خودنمائی تے ہوندے، اے اپݨے آپ کوں دیوتا تے ہیرو کنیں گھٹ نئیں ڄاݨدے۔ ایندا نتیجہ اے ہے جو پولیٹیکل کوآپشن دے شکار وچ اے ہک وݙا چارہ بݨ سڳدن تے ایہو کُجھ تھیندا پئے۔ اڄ جݙاں سرائیکی تحریک ہک ننواں سیاسی انگ گھندی پئی ہے تاں شاعریں تے لکھاریں دی اکثریت اُلٹے پیریں ٹردی پئی ہے۔ پر انہیں کوں اپݨی خود پسندی تے انا دے گھمنڈ وچ اے نئیں ڄاݨ جو ویلھا وٹیج ڳئے تے اے "کوآپشن" انہیں کیتے کوئلے دی دلالی بݨ ویسی جیندے وچ منہ مُکالا تھی ویندے۔ شاکا گاڈی