پرویز جھمٹ

اصل ناں       غلام محمد

تخلص          پرویزؔ

جٖمنْ           1947ء

تعلیم           میٹرک

پیشہ            ریٹائر فوجی(حوالدار)

فون نمبر        03455837061

جاہ پتہ         جھمٹاںوالہ ضلع میانوالی

پرویز جھمٹ صاحب دا شمار ضلع میانوالی دے نمائندہ شاعراں وچ تھیندے ۔آپ زمانہ طالب علمی توں شاعری دا آغاز کیتا تے کئی شعری کتاباں تخلیق کر کے شائع کرا چکے ہن۔مثلًا300ڈٖوہڑیاں تے مشتمل آپ دا منظوم قصہ ’’ہیر رانجھا ‘‘،’’زخمی دل دی فریاد‘‘،’’رموزِ شاعری‘‘،’’پرویز دے ڈٖوہڑے‘‘،’’جھریٹاں‘‘وغیرہ۔آپدیاں مشہور کتاباں ہن۔ عطاء اللہ خان عیسٰی خیلوی سمیت کئی گلو کار آپ دا کلام’’ گٖا ‘‘چکے ہن۔پرویز صاحب دا غزلیہ کلام پیشِ خدمت ہے۔

غزل

کیا میکدہ ادب ہے سعادت نویں نویں ہے

میں تاں شرابی کوئی نہ عادت نویں نویں ہے

موسم بہار جٖاپے ہر پاسے پھُل کھڑے ہن

گلشن نواں نواں ہے لطافت نویں نویں ہے

شاہکار حسن والا ویکھنْ پیا ہاں ویندا

دل وی پیا دھڑکدائے زیارت نویں نویں ہے

حاتم حسن دا جیویں وقفہ حجاب رکھیں

ہستی نویں نویں ہے سخاوت نویں نویں ہے

سوہنْے دے نال پرویزؔ دلڑی وٹا تاں بٖیٹھاں

رب سوہنْاں سدھ کریسی ارادت نویں نویں ہے

غزل

میڈٖے گھر دے نیڑے جو گھر اوندا ہووے

توڑے میں تے جتناں قہر اوندا ہووے

دِنے راتیں ڈٖہدا ہی ڈٖہدا میں رہواں

میڈٖے وانگوں شالا جگر اوندا ہووے

جو جیکر میں روواں تے گُسکاں او رووے

میڈٖی ہاواں دیوچ اثر اوندا ہووے

جو قاصد کوں کوں بھیجٖاں او  ول ول کے ڈٖسدائے

تیڈٖے ناں تے ظلم و جبر اوندا ہووے

میں راہواں تے لُک چھُپ کے پرویزؔ بٖیٹھاں

متاں اِتھوں کہیں ڈٖینہ گزر اوندا ہووے

٭٭٭