ٻیٹ سون٘ترہ

/ɓɛːʈ sɔː̃t̪rəɦ/

ٻیٹ سون٘ترہ ضلع راڄن پور دی ہک وستی ہے جیڑھی راڄن پور شہر دے پوادھی پاسوں 20 کلو میٹر دی وتھی تے سن٘دھ دریا دی مݨ تے ہے۔ ٻیٹ سون٘ترہ آپݨے تل وِچ وݨج وپار دا وݙا ڳڑھ ہے۔ ٻیٹ سون٘ترہ یونین کونسل وی ہے تے موضع وی۔ ٻیٹ سون٘ترہ کنوں ہک سڑک فاضل پور ہک سڑک راڄن پور تے ہک سڑک کوٹ مٹھݨ ݙو وین٘دی ہے۔ ٻیٹ سون٘ترہ دے لوک کھلݨے ہسݨے تے ݙاڈھے ڳݨیتے ہن۔ ٻیٹ سون٘ترہ ادبی تے سیاسی سرگرمیاں تے سن٘گت سان٘جھ دا نویکلا مرکز ہے۔ ٻیٹ سون٘ترہ دا جغرافیہ، کھٹی کمائی دے موقع تے تل وطنی لوکیں دے جی وچ جاہیں ݙیوݨ والے ڳݨاں دی وجہ توں ٻیٹ سون٘ترہ وچ لݙ آوݨ والے لوکیں دی تعداد ودھدی پئی ہے۔سن٘دھ دریا دے مݨ تے ہووݨ دے پاروں جݙاں دریا دی چھل چڑھدی ہے تاں پاݨی ٻیٹ سون٘ترہ دی درسال تئیں آن پڄدے۔مد فکری دی ڳالھ ایہ ہے جو اتھاں حالی تئیں نہ تاں ہائی سکول ہے تے نہ وت سرکاری ہسپتال۔