ٻالاں کِیتے ماء دے ٻول
تعارف
سرائیکی ٻہوں وݙاسماج ہے، ایندی سیر کروں تاں ہک ہک قدم تے حکمت دے نمونے تے جھلکیاں ملسن ۔سرائیکی اکھاݨ تے سرائیکی ٻجھارتاں، ٻالاں کِیتے وݙیاں دے ٻول اُون٘ویں اِی ماء دے ٻول وی ہون٘دن جِہڑے او ٻالاں کِیتے الین٘دے ہِن۔
نمونے دے کُجھ ٻول حاضر ہِن:
دُعا۔۔۔ ماء دی
صدقے دی صدقائی
صدقے دی صدقائی
تیݙی بی نہ ݙیکھاں کئی
تیݙے دُشمن پیسِن چَھئی
صدقے تے صدقے
صدقے تے صدقے
دُعا کریسِن وݙکے
وَݙکیاں دی دُعا
ݙِتّے ٻچّے پا ری پا (پال دی پال)
منگدیاں دی سِک لہا
دُعا ۔۔۔ ٻال کوں
ٹھرّی ٹھرّی ٹھرّی
ٹھرّی ٹھرّی ٹھرّی
بدلیں دی دَرّی
پلُوتے ݙیندی مرّی
ٹھرّی ماء ٹھرّی
ٹھرّی ماء ٹھرّی
پَلُوتےݙین٘دی مرّی
پلُوتا کُئی نہ ݙیوے
سارا لوک ݙیوے دُعا
ٹَل ون٘ڄے کُل بلا
رکّھی آپ خُدا
آ آ آ ۔۔۔ سݙ کریسی ما
آ آ آ ۔۔۔ سݙ کریسی ما
روٹی ݙیسی چوپڑی، گِھیؤ گھتیسی پا
کھٹّݨ آلا بابا جیوی، ݙیوݨ آلی ما
آوے (ٻال دا ناں) چُوریاں کُٹ کُٹ کھا
صدقے صدقے صدقے
صدقے صدقے صدقے
میݙا خان ٻدھین٘دے پَٹکے
تیݙا دُشمن مارے چَٹکے
صدقے صدقے صدقے
صدقے صدقے صدقے
دُعا کرین٘دِن وݙکے
دُعا کریسی سارا لوک
نوکر کھڑسی کُل بلوچ
نِکّے نِکّے پِیر
نِکّے نِکّے پیر
کم کریسِن ڈھیر
چُݨ گِھن آسِن ٻیر
نِکّے نِکّے ہَتھ
نِکّے نِکّے ہَتھ
کم کریسِن وَت
اِیویں کھاسِن بَھت
چِٹّا تاں کٹورا
چِٹّا تاں کٹورا
وِچ پِیلا پُلاء
میں پَکّھا ٻیٹھی جَھلّاں
تُوں گِران٘ہ ٻیٹھا کھا
ٹھر تاں ویسی لوک
ٹھر تاں ویسی لوک
میݙی اللہ وسائی جھوک
گھر گھتّیں امّاں دے کول
مرضی پووی تاں مِٹّھا ٻول
نہ تاں جھیڑے کوں ٻیٹھا چول
کُھوہ تیݙے تے اَݙ واہوے کِھیر دی
کُھوہ تیݙے تے اَݙ واہوے کِھیر دی
تُوں پُتر نواب دا، میں دِھی فقیر دی
کُھوہ تیݙے تے لوٹے ٻَدِّن ارائیں
کُھوہ تیݙے تے لوٹے ٻَدِّھن ارائیں
دِھیّاں مال بِغاناں، پُتر مِلخاں دے سائیں
ٻِیا ݙیکھو
حوالہ
- ساݙا ترکہ (2)، مؤلف: پروفیسر شوکت مُغل، جھوک پبلشرز ملتان، 2014ء۔