ون ویلنگ

اماں میڈا پُتر کڈھاؤ ڈیٹھی؟، نہ اماں میں تاں نیں ڈیٹھا تساں گھر جُلو اُو آ ویسی چنتا نہ کرو میڈا پُتر چنتا کیویں نہ کراں ایھا گال تاں میڈا پُتر وی کریندا ھا اماں تُوں چنتا نہ کیتا کر میکوں کجھ نیں تھیندا میں ہُنڑ موٹر سائیکل ہکے ویل تیں وی چلا سگداں میں ہُنڑ پکا استاد بنڑ گیاں، توں ایویں چنتا کریندی ھئیں، پَر میڈا چنتا ٹھیک ھا ہک ڈینھ اُو لوکیں دے مونڈھیں تیں گھر آئے میڈی دنیاں سُنج تھی گئ ھے، میڈا پورھیا لُٹیج گئے میں بخت دے تخت توں ڈیھ پئ ھاں، اماں میں پُنجھ ہار کے اوکوں پالیا ھا میں پُوہ دے پالے ءچ اوکوں تن ساڑ کے گرمی ڈتی ھئ میں ہاڑ دی دُھپ ءچ ٹھڈے ساہ ڈتے ہن، میں سِرو ننگیں گزار کے بوچھنڑ دی گنگوٹی بنڑائ ھئ، میں زمانے دے نظریں ءچ کُوڑھی تھی کے گندی سڈویج کے اوکوں بمبوٹے سکھائے ہن کلھی تریمت ہم اماں توں سوچ کے ڈس میڈے نال کیا کجھ نہ تھیاء ھوسی، میں مانگویں جُتی کپڑے پاء کے اوکوں شھر ءچو مہانگے کپڑے گھن تے پویندی ہم، جڈاں نویں کپڑے پاء کے میڈا لال شھر ویندا ھا وستی دے طعنے میں سُنڑدی ھم، پتہ نیں ایندی ماء کتھو پیسے انیندی ھے

میڈا پتر، انھیں کوں سمجھا جیرھے موٹر سائیکل چلیندن انھیں کوں آکھ میڈے لال پُتر اؤکھے جوان تھیندن، تھاڈے ابے اماں دی زندگی گلدی ھے، تھاڈا ابا در بدر تھیندے، کڈھائیں سعودیہ دی گرمی ءچ اٹھویں منزل تیں مونڈھیں تیں سلھیں سیمنٹ چئیندے کڈھائیں دوبئ دے بڑکدے صحراء ءچ جسم تیں روح کوں بُھن کے تھاڈیاں خُوشیاں گُلیندے، کڈھائیں چوک تیں وکدے گالھے پُترو اتناں سوچ وی نہوے آندی خود چوک تیں کُکڑیں دے مُل وکا کے تہاکوں پنجاہ سٹھ ہزار دا موٹر سائیکل گھنا ڈیندے، تساں لحظے دی خوشی واسطے ساڈی عمراں دا پُورھیا ساڑ چھوڑیندے ھاؤ تھاکوں ماء دے مونھ تیں وقت کنیں پہلے بڈھیپے دیاں جُھریاں نیں نظردیاں تھاکوں پیؤ دے اکھیں ءچ چمکار نیں نظردا جو ہنڑ پتر جوان تھی آئے میڈا سہارا تھی آئے میڈے تھکیڑے لہسن میڈے ہتھیں دے چھالیں دی قیمت وصول تھیسی ،میں گھوٹ دا پیؤ سڈویساں میں گانے بدھساں میں جھمراں پئیساں اے کینجھی تھاڈی خوشی ھے جیرھی ساکوں عمراں دا چُوڑھیا ڈی ویندی ھے، میڈا پُتر ملے تاں آکھیں اوکوں، امڑی تانگھ ءچ ھے، ہک واری آ کے صرف اماں سڈ ونج،،،،،،